ନୂଆଦିଲ୍ଲୀ: ପ୍ରଗତି ମଇଦାନର ଭାରତ ମଣ୍ଡପରେ ଆରମ୍ଭ ହୋଇଯାଇଛି ଜି20 ମହାକୁମ୍ଭ । ବିଶ୍ବନେତାଙ୍କୁ ସ୍ବାଗତ ପରେ ଆରମ୍ଭ ହୋଇଯାଇଛି ପ୍ରଥମ ସେସନ । ଏହା ପୂର୍ବରୁ ସମ୍ବୋଧନ ସମୟରେ ଆଫ୍ରିକୀୟ ୟୁନିୟନକୁ ଜି 20ର ସ୍ଥାନୀୟ ସଦସ୍ୟ ଭାବେ ଘୋଷଣା କରିଛନ୍ତି ପ୍ରଧାନମନ୍ତ୍ରୀ । ଆଫ୍ରିକୀୟ ୟୁନିୟନର ଅଧ୍ୟକ୍ଷ ଅଂଜାଲି ଅସୋମାନିଙ୍କୁ ଆସନ ଗ୍ରହଣ କରିବାକୁ କହିବା ସହ ଆଲିଙ୍ଗନ କରିଥିଲେ ପ୍ରଧାନମନ୍ତ୍ରୀ । ଜି 20ରେ ଆଫ୍ରିକୀୟ ୟୁନିୟନର ସଦସ୍ୟତା ନେଇ ସମସ୍ତଙ୍କ ସହମତି ରହିଥିବା ମଧ୍ୟ କହିଥିଲେ । ଜି 20ରେ ମୋଟ 20ଟି ଦେଶ ସଦସ୍ୟ ରହିଥିବା ବେଳେ ଆଫ୍ରିକୀୟ ୟୁନିୟନ ସଦସ୍ୟ ହେବା ପରେ ଏହା ଜି 21ରେ ପରିଣତ ହୋଇଛି ।
ଜି 20 ସମ୍ମିଳନୀରେ ପ୍ରଧାନମନ୍ତ୍ରୀ କହିଥିଲେ ଯେ, ସମସ୍ତଙ୍କ ସହମତିରେ ମୁଁ ଆଫ୍ରିକୀୟ ୟୁନିୟନର ଅଧ୍ୟକ୍ଷଙ୍କୁ ଜି 20ର ସ୍ଥାୟୀ ସଦସ୍ୟ ଭାବେ ଆସନ ଗ୍ରହଣ କରିବାକୁ ମୁଁ ନିମନ୍ତ୍ରଣ କରୁଛି । ଏହାପରେ ଆଫ୍ରିକୀୟ ୟୁନିୟନର ଅଧ୍ୟକ୍ଷ ଅଂଜାଲି ଅସୋମାନି ଜି 20 ସମ୍ମିଳନୀରେ ସ୍ଥାୟୀ ସଦସ୍ୟ ଭାବେ ଆସନ ଗ୍ରହଣ କରିଥିଲେ । ଜି 20ରେ ଆଫ୍ରିକୀୟ ୟୁନିୟନକୁ ସଦସ୍ୟତା ଦେବା ଭାରତର ମୁଖ୍ୟ ଲକ୍ଷ୍ୟ ରହିଥିଲା । ଆଫ୍ରିକୀୟ ୟୁନିୟନକୁ ଜି-20ରେ ସାମିଲ କରିବା ପାଇଁ ଜୁନ ମାସରେ ପ୍ରଧାନମନ୍ତ୍ରୀ ମୋଦି ପ୍ରସ୍ତାବ ଦେଇଥିଲେ ।