ଇସଲାମବାଦ: ଶସ୍ତା ହୋଇଛି ପେଟ୍ରୋଲ ଓ ଡିଜେଲ ଦାମ । କେନ୍ଦ୍ର ସରକାରଙ୍କ ନିଷ୍ପତ୍ତି ଅନୁଯାୟୀ, ପେଟ୍ରୋଲ ଓ ଡିଜେଲରୁ ଏକ୍ସାଇଜ୍ ଡ୍ୟୁଟି କମିଛି । ପେଟ୍ରୋଲ ଉପରୁ ଲିଟର ପିଛା ୮ ଟଙ୍କା କମିଥିବା ବେଳେ, ଡିଜେଲ ଉପରୁ ୬ ଟଙ୍କା କମିଛି । ଆଜି(ରବିବାର) ସକାଳ ୬ଟାରୁ ଏହି ନୂଆ ଦର ଲାଗୁ ହୋଇଛି । ତେବେ ସବୁଠାରୁ ଆଶ୍ଚର୍ଯ୍ୟର ବିଷୟ ଯେ, ସର୍ବଦା ଭାରତ ଉପରେ ଅଭିଯୋଗ ଲଦୁଥିବା ଇମ୍ରାନ ଖାନ, ଦର ହ୍ରାସ ପାଇବାକୁ ସ୍ବାଗତ କରିବା ସହ ଭାରତକୁ ପ୍ରଶଂସା କରିଛନ୍ତି ।
ଗତକାଲି କେନ୍ଦ୍ର ସରକାର ତେଲ ଦର ଉପରେ ଉତ୍ପାଦନ ଶୁଳ୍କ ହ୍ରାସ କରିବା ପରେ ଭାରତ ସରକାରଙ୍କୁ ପ୍ରଶଂସା କରିଛନ୍ତି ପୂର୍ବତନ ପାକ ପ୍ରଧାନମନ୍ତ୍ରୀ ଇମ୍ରାନ ଖାନ । ଋଷିଆ ଠାରୁ ଭାରତର ଶସ୍ତାରେ ତେଲ କିଣିବା ନିଷ୍ପତ୍ତିକୁ ଇମ୍ରାନ ସ୍ୱାଗତ କରିଛନ୍ତି । ଆମେରିକାର ଚାପ ପ୍ରୟୋଗ ସତ୍ତ୍ବେ ଋଷର ରିହାତି ଦରରେ ତୈଳ କିଣି ଇନ୍ଧନ ଦର ହ୍ରାସ କରିଥିବାରୁ ଭାରତର ବୈଦେଶିକ ନୀତିକୁ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ୍ ଖାନ ପ୍ରଶଂସା କରିଛନ୍ତି ।