ଲଣ୍ଡନ: କୋରୋନା ସ୍ଥିତିରେ ସୁଧାର ଆସିବା ପରେ ୟୁକେରେ ଆରମ୍ଭ ହୋଇଥିବା ବିମାନ ସେବା । ହେଲେ ଏହି ସେବାର ଲାଭ ନେଉଥିବା ଯାତ୍ରୀମାନଙ୍କ ପାଇଁ କିଛି କଟକଣା ଜାରି କରିଥିଲା ୟୁକେ ସରକାର । ଏହି ନିୟମ ଅନୁଯାୟୀ ୟୁକେରେ ପହଞ୍ଚିବା ପରେ ଯାତ୍ରୀଙ୍କୁ ବାଧ୍ୟତାମୂଳକ 14 ଦିନିଆ କ୍ବାରେଣ୍ଟାଇନରେ ରହିବାକୁ ପଡିବ । ହେଲେ ଏହି ନିୟମରୁ କିଛି ଦେଶକୁ ଆରମ୍ଭରୁ ବାଦ ଦିଆଯାଇଥିଲା । ଯେଉଁଥିରେ ଏବେ ସାମିଲ ହୋଇଛି ଆଉ 5 ଦେଶ ।
ଶୁକ୍ରବାର ଏନେଇ ଘୋଷଣା କରାଯାଇ ସ୍ପଷ୍ଟ କରାଯାଇଛି କି ନୂଆ ନିୟମ ଆସନ୍ତା ଜୁଲାଇ 28ରୁ କାର୍ଯ୍ୟକାରୀ ହେବ । ଏହି ନୂଆ ନିୟମ ଅନୁଯାୟୀ ଇଷ୍ଟୋନିଆ, ଲାଟଭିଆ, ସ୍ଲୋଭାକିଆ, ସ୍ଲୋଭେନିଆ ଓ ସେଣ୍ଟ ଭିନସେଣ୍ଟ ଏବଂ ଗ୍ରେନାଡାଇନ ଆଦି ଦେଶର ଯାତ୍ରୀଙ୍କୁ କ୍ବାରେଣ୍ଟାଇନ କଟକଣାରୁ ବାଦ ଦିଆଯିବା ନେଇ ସ୍ପଷ୍ଟ ହୋଇଛି । ଏହାପୂର୍ବରୁ ମାସ ଆରମ୍ଭରେ ୟୁକେ ଦ୍ବାରା ସୁରକ୍ଷିତ 74 ସ୍ଥାନର ଏକ ତାଲିକା ପ୍ରସ୍ତୁତ କରାଯାଇଥିଲା । ଯେଉଁଠୁ ଆସୁଥିବା ଯାତ୍ରୀଙ୍କୁ କ୍ବାରେଣ୍ଟାଇନ ନିୟମ ମାନିବାକୁ ହେବ ନାହିଁ ବୋଲି କୁହାଯାଇଥିଲା । ଏବେ ଏଥିରେ ଉପରୋକ୍ତ 5ଟି ରାଷ୍ଟ୍ର ପୁଣି ସାମିଲ କରାଯାଇଛି ।
ଆଗକୁ ସାପ୍ତାହିକ ଭାବେ ଏହି ତାଲିକାରେ ଆବଶ୍ୟକ ମୁତାବକ ପରିବର୍ତ୍ତନ କରାଯିବ ବୋଲି ବୋରିସ ସରକାର ସ୍ପଷ୍ଟ କରିଛି । ଇତି ମଧ୍ୟରେ ପରିବହନ ସଚିବ ଗ୍ରାଣ୍ଟ ସାପ୍ସ ସୋମବାର ଦିନ ପର୍ତ୍ତୁଗାଲ ସହ ଆକାଶ ବ୍ରିଜ ବା ଆକାଶ ମାର୍ଗରେ ପରିବହନ ବ୍ରିଜ ନେଇ ଘୋଷଣା କରିବାର ଯୋଜନା ରହିଛି । ଏହି ଦେଶକୁ ସୁରକ୍ଷିତ ସ୍ଥାନ ତାଲିକାରୁ ବାଦ ଦେବା ପରେ ପର୍ତ୍ତୁଗିଜ ସରକାର ଏନେଇ କ୍ଷୋଭ ପ୍ରକାଶ କରିବାରୁ ଏହି ପଦକ୍ଷେପ ନିଆଯିବା ନେଇ ସ୍ପଷ୍ଟ ହୋଇଛି ।
ଗୋଟିଏ ପଟେ କଟକଣା ଧିରେ ଧିରେ କୋହଳ ହେବାରେ ଲାଗିଥିବା ବେଳେ ଅନ୍ୟପଟେ କୋରୋନା ସଂକ୍ରମଣରେ ମଧ୍ୟ ଅବନତି ହେବାରେ ଲାଗିଥିବା ଦେଖାଯାଉଛି । ଏନେଇ ଏହି ଦକ୍ଷିଣ-ପଶ୍ଚିମାଞ୍ଚଳ ୟୁରୋପିଆନ ଦେଶରେ ଦିନକୁ ମାତ୍ର 127 ଟି ମାମଲା ଚିହ୍ନଟ ହୋଇଥିବା ଦେଖାଯାଇଛି । ଯାହା ମାର୍ଚ୍ଚ ମାସରୁ ଏଯାବତ୍ ରେକର୍ଡ ହୋଇଥିବା ସର୍ବନିମ୍ନ ସଂଖ୍ୟା ବୋଲି ଆକଳନ କରାଯାଇଛି । ପ୍ରକାଶ ଥାଉ କି ଦେଶରେ କୋରୋନା ସଂକ୍ରମଣରୁ ରକ୍ଷା ପାଇଁ କାନାଡା, ଆମେରିକା, ସ୍ବିଡେନ, ଋଷିଆ ଓ ମଧ୍ୟ ତଥା ଉତ୍ତର ଆମେରିକାର ଅନେକ ରାଷ୍ଟ୍ରରୁ ଯାତ୍ରା କରୁଥିବା ବିମାନଯାତ୍ରୀଙ୍କୁ 14 ଦିନିଆ କ୍ବାରେଣ୍ଟାଇନ ବାଧ୍ୟତାମୂଳକ କରାଯାଇଥିଲା ।
@IANS
