ଲଣ୍ଡନ: ୟୁକେରେ ଜାରି ରହିଥିବା 2 ମିଟରର ସାମାଜିକ ଦୂରତ୍ବ ନିୟମ କେତେ ଦୂର ଠିକ୍, ସେନେଇ ଜାରି ରହିଛି ସମୀକ୍ଷା । ପ୍ରଧାନମନ୍ତ୍ରୀ ବୋରିସ ଜନସନଙ୍କ ପ୍ରତ୍ୟକ୍ଷ ତତ୍ତ୍ବାବଧାନରେ ଏହି ସମୀକ୍ଷା ଚାଲିଥିବା ବେଳେ ଏହି ପ୍ରକ୍ରିୟା ବର୍ତ୍ତମାନ ଶେଷ ପର୍ଯ୍ୟାୟରେ ପହଞ୍ଚିଛି । ଏନେଇ ସୂଚନା ଦେଇଛନ୍ତି ୟୁକେ ସାଂସ୍କୃତିକ ସଚିବ ଅଲିଭର ଡାଉଡେନ ।
ଡାଉଡେନ ଗଣମାଧ୍ୟମକୁ ସୂଚନା ଦେଇ କହିଛନ୍ତି କି ସରକାରଙ୍କ ଦ୍ବାରା ଚାଲିଥିବା ଏହି ସମୀକ୍ଷା ପ୍ରକ୍ରିୟା ଆଗାମୀ କିଛି ଦିନ ମଧ୍ୟରେ ସମାପ୍ତ ହେବ । ବର୍ତ୍ତମାନ ଲାଗୁ ରହିଥିବା 2 ମିଟରର ସାମାଜିକ ଦୂରତ୍ବ ନିୟମ ଦେଶରେ ଅନେକ ବ୍ୟବସାୟ ପ୍ରତି ବିପଦ ସୃଷ୍ଟି କରିବା ସହ ଅନେକ କ୍ଷେତ୍ରରେ ଏହା ସମ୍ଭବ ନୁହେଁ ବୋଲି ବିରୋଧୀମାନେ ସ୍ବର ଉତ୍ତୋଳନ କରିଥିଲେ । ସେପଟ ବିଶ୍ବ ସ୍ବାସ୍ଥ୍ୟ ସଙ୍ଗଠନ ମଧ୍ୟ 1.5ମିଟର ବ୍ୟବଧାନର ସାମାଜିକ ଦୂରତ୍ବ କଟକଣା ଲାଗୁ ପାଇଁ ଗାଇଡଲାଇନ ଜାରି କରିଥିଲେ ।