ଆଗଧାଡିର ବିଦେଶୀ କର୍ମୀଙ୍କ ନାଗରିକତ୍ବ ପ୍ରସଙ୍ଗ: ମୁହଁ ଖୋଲିଲେ ପ୍ରୀତି ପଟେଲ

ଗୃହ ସଚିବ ପ୍ରୀତି ପଟେଲ କହିଥିଲେ କି ଏହି ବିଦେଶୀ କର୍ମୀମାନଙ୍କୁ ଦେଶର ସେବା ପାଇଁ ପୁରସ୍କାର ସ୍ବରୂପ ୟୁକେରେ ନାଗରିକତ୍ବ ପ୍ରଦାନ କରାଯିବ । ହେଲେ ଏହି ପ୍ରସଙ୍ଗରେ ଶନିବାର ପୁଣି ମୁହଁ ଖୋଲିଛନ୍ତି ପ୍ରୀତି ।

ଲଣ୍ଡନ: କୋରୋନା ମୁକାବିଲାରେ ଅନେକ ବିଦେଶୀ ନାଗରିକ ଆଗଧାଡିରେ ଦାୟିତ୍ବ ତୁଲାଉଥିବା ବେଳେ ଏମାନଙ୍କ ପାଇଁ ଏକ ଗୁରୁତ୍ବପୂର୍ଣ୍ଣ ଘୋଷଣା କରିଥିଲା ୟୁକେ । ଗୃହ ସଚିବ ପ୍ରୀତି ପଟେଲ ଏନେଇ କହିଥିଲେ କି ଏହି ବିଦେଶୀ କର୍ମୀମାନଙ୍କୁ ଦେଶର ସେବା ପାଇଁ ପୁରସ୍କାର ସ୍ବରୂପ ୟୁକେରେ ନାଗରିକତ୍ବ ପ୍ରଦାନ କରାଯିବ । ହେଲେ ଏହି ପ୍ରସଙ୍ଗରେ ଶନିବାର ପୁଣି ମୁହଁ ଖୋଲିଛନ୍ତି ପ୍ରୀତି ।

ସେ କହିଛନ୍ତି କି କୋରୋନା ମୁକାବିଲା ପାଇଁ ଅନେକ ବିଦେଶୀ ସ୍ବାସ୍ଥ୍ୟ କର୍ମଚାରୀ ନିଜ ସମୟ ଦେଇଛନ୍ତି । ଦେଶ ସେମାନଙ୍କ କର୍ତ୍ତବ୍ୟନିଷ୍ଠକୁ ସମ୍ମାନ ଦେଇ ସେମାନଙ୍କୁ ସୁବିଧା ସ୍ବରୂପ ବାର୍ଷିକ ସ୍ବାସ୍ଥ୍ୟ ସୁବିଧା ଆକାରରେ 400 ପାଉଣ୍ଡ ପ୍ରଦାନ କରୁଛି । ହେଲେ ଏହି ସୁବିଧା ପ୍ରତିବଦଳରେ ଦେଶ ସେମାନଙ୍କୁ ନାଗରିକତ୍ବ ପ୍ରଦାନ କରିବା ପାଇଁ ଚିନ୍ତା କରୁଛି । ଶୁକ୍ରବାର ଦୈନିକ ବିବରଣୀ ଦେବା ସମୟରେ ଏହି ପ୍ରସଙ୍ଗକୁ ନେଇ ପଚରା ଯିବାରୁ ସେ ବିଷୟରୁ ଓହରି ଅନ୍ୟ ଦିଗକୁ ଦୃଷ୍ଟି ଆକର୍ଷଣ କରିଥିଲେ ।

ଜବାବ ଦେଇ ସେ କହିଛନ୍ତି କି ଦେଶର ଇମିଗ୍ରେସନ ଆଇନ ଅତି ଜଟିଳ । ସେଥିରେ ପୁଣି ଲକଡାଉନ କଟକଣା ଯୋଡି ହେବାରୁ ଅଧିକ ଜଟିଳ ହୋଇଛି ଏହି ପ୍ରକ୍ରିୟା । ତେବେ ଏନଏଚଏସରେ ଥିବା ବିଦେଶୀ କର୍ମୀ ଓ ସୋସିଆଲ କେୟାର ୱାର୍କରଙ୍କ ପାଇଁ ଏହି ନାଗରିକତ୍ବ ପ୍ରଦାନ ପାଇଁ ଆଇନର ସହମତି ରହିବା ଦରକାର । ତେବେ ବର୍ତ୍ତମାନ ସୁଦ୍ଧା ଏହି ଇମିଗ୍ରେସନ ଓ ସୋସିଆଲ ସିକ୍ୟୁରିଟି ବିଲ ଗୃହରେ ଆଗତ ହୋଇନଥିବା ନେଇ ପ୍ରୀତି ସ୍ପଷ୍ଟ କରିଛନ୍ତି ।

ସେପଟେ ପ୍ରଧାନମନ୍ତ୍ରୀ ବୋରିଶ ଜନଶନ ଗୁରୁବାର ଘୋଷଣା କରିଛନ୍ତି କି ବିଦେଶୀ ଏନଏଚଏସ କର୍ମୀ ଓ ସୋସିଆଲ କେୟାର ୱାର୍କର ସ୍ବାସ୍ଥ୍ୟ ସେବାର ସୁବିଧା ଉଠାଇବା ପାଇଁ ଦିଆଯାଇଥିବା ସରଚାର୍ଜ ବା ଅତିରିକ୍ତ ଅର୍ଥ ଆଉ ଦିଆଯିବ ନାହିଁ । ଏଥିସହ ଲକଡାଉନ ପାଇଁ ଓ ସେଲ୍ଫ ଆଇସୋଲେସନ ପାଇଁ ଦେଶରେ ଫସି ରହିଥିବା ବିଦେଶୀ ନାଗରିକ ନିଜର ଭିସା ଅବଧି ବୃଦ୍ଧି କରିପାରିବେ ।

@IANS