ତାଇପେ: ଆମେମାନେ ସାଧାରଣତଃ ମାଛ, ମାଂସ, ଫଳ, ପନିପରିବା ଇତ୍ୟାଦି କାଟିବାରେ ଛୁରୀକୁ ବ୍ୟବହାର କରିଥାଉ । କିନ୍ତୁ ଆପଣ କେବେ ଶୁଣିଛନ୍ତି କି ଏକ ଛୁରୀଦ୍ବାରା ମସାଜ ବି ହୋଇପାରିବ? ଏହା ଶୁଣିବାକୁ ଟିକେ ଅଜବ ଲାଗିପାରେ ମାତ୍ର ଏହା ସତ ।
ତାଇୱାନର ମସାଜ ପାର୍ଲରରେ ଲୋକମାନଙ୍କୁ ଛୁରୀ ସାହାଯ୍ୟରେ ମସାଜ ଦିଆଯାଏ । ଆଉ ଏହି ମସାଜକୁ 'ଡାଉଲିଆଓ' କୁହାଯାଏ । ଯାହାର ଅର୍ଥ ଚାଇନିଜ୍ ଭାଷାରେ 'ଚୁଆର୍ ସେ ମସାଜ୍' କିମ୍ବା 'ଛୁରୀ ଥେରାପି' । ଏହା ଚାଇନାର ଖୁବ୍ ଲୋକପ୍ରିୟ ମସାଜ୍ । ଏବି ମସାଜ୍ ପ୍ରାୟ 2000 ବର୍ଷ ପୁରୁଣା । ଏହାକୁ ବୌଦ୍ଧ ଭିକ୍ଷୁମାନେ ଆରମ୍ଭ କରିଥିବା କୁହାଯାଏ ।
ପ୍ରାୟ ଏକ ହଜାର ବର୍ଷ ପୂର୍ବେ, ଟାଙ୍ଗ ରାଜବଂଶୀଙ୍କ ସମୟରେ ଜାପାନରେ ଏହି ଥେରାପି ଆରମ୍ଭ ହୋଇଥିଲା । 1940 ଦଶକରେ ଚାଇନାର ଗୃହଯୁଦ୍ଧ ସମୟରେ ଏହି ପରମ୍ପରା ତାଇୱାନରେ ପହଞ୍ଚିଥିଲା । ଯଦିଚ ଏହି ଚିକିତ୍ସା ପ୍ରକ୍ରିୟା ଆଜି ଚୀନ୍ ଏବଂ ଜାପାନରେ ପହଞ୍ଚି ସାରିଛି ତଥାପି ତାଇୱାନରେ ଏହା ବହୁତ ଲୋକପ୍ରିୟ । ତେବେ ଏହି ଥେରାପିର ଶିକ୍ଷା ଦେବା ପାଇଁ ତାଇୱାନର ରାଜଧାନୀ ତାଇପେରେ ଏକ ଶିକ୍ଷା କେନ୍ଦ୍ର ମଧ୍ୟ ଖୋଲାଯାଇଛି ।
ଏହାର ନାମ ହେଉଛି, ଦ ଏନସିଏଣ୍ଟ ଆର୍ଟ ଅଫ୍ ନାଇଫ୍ । ତାଇୱାନରେ ଏହି ଶିକ୍ଷା କେନ୍ଦ୍ରର ପ୍ରାୟ 36ଟି ଶାଖା ରହିଛି । ସେଥିମଧ୍ୟରୁ 15ଟି କେବଳ ଗତ ପାଞ୍ଚ ବର୍ଷ ମଧ୍ୟରେ ଖୋଲାଯାଇଛି । ଏଠାରେ ସମଗ୍ର ଦୁନିଆର ଲୋକଙ୍କୁ ଛୁରୀରେ ମସାଜ କରିବାର କଳା ଶିକ୍ଷା ଦିଆଯାଏ । ଏହି ଚିକିତ୍ସା ଶିଖିବାକୁ ଫ୍ରାନ୍ସ, କାନାଡା, ହଂକଂ ଏବଂ ଜାପାନର ଲୋକମାନେ ତାଇୱାନକୁ ଆସିଥାନ୍ତି ।