କାବୁଲ: ଆଫଗାନିସ୍ତାନରେ ତାଲିବାନର କବଜା ପରେ ସ୍ଥିତି ସମ୍ପୂର୍ଣ୍ଣ ଭୟାବହ ହୋଇପଡିଛି । ଏଭଳି ସ୍ଥିତିରେ ଜୀବନ ବଞ୍ଚାଇବାକୁ ଖୁବଶୀଘ୍ର ଦେଶ ଛାଡି ପଳାୟନ କରିବା ପାଇଁ ବିକଳ ହେଉଛନ୍ତି ଲୋକେ । ଏହାରି ମଧ୍ୟରେ କାବୁଲରୁ ସାମ୍ନାକୁ ଆସିଛି ଏକ ଛାତିଥରା ଭିଡିଓ ।
ବିମାନବନ୍ଦରରେ ଲୋକଙ୍କ ଲାଗିଛି ଅସମ୍ଭାଳ ଭିଡ । ଗୋଟିଏ ବିମାନରରେ ଲୋକେ ଓହଳିକି ଯିବାକୁ ଚେଷ୍ଟା କରୁଛନ୍ତି । ବିମାନଟି କିଛି ବାଟ ଉଡାଣ ଭରିବା ପରେ ଏଥରୁ ଓହଳିଥିବା ୩ ଜଣ ଯାତ୍ରୀ ତଳକୁ ଖସିପଡୁଥିବା ଦେଖିବାକୁ ମିଳିଛି । କାବୁଲ ବିମାନବନ୍ଦର ନିକଟରେ ଥିବା ସ୍ଥାନୀୟ ଲୋକମାନେ ଦାବି କରିଛନ୍ତି ଯେ ବିମାନର ଟାୟାରକୁ ଧରିଥିବା ତିନିଜଣ ଯୁବକ ଗୋଟିଏ ଘରର ଛାତ ଉପରେ ଖସିପଡିଛନ୍ତି। ୩ ଜଣ ବହୁତ ଉଚ୍ଚତାରୁ ଖସି ମୃତ୍ୟୁବରଣ କରିଥିବା କୁହାଯାଉଛି ।
ଆଫଗାନିସ୍ତାନରେ ଯଦିଓ ତାଲିବାନ ନିଜ ବିଜୟ ସହ ଯୁଦ୍ଧର ଅନ୍ତ ନେଇ ଘୋଷଣା କରିଛି, ହେଲେ ଏହି ସଙ୍କଟ ସମୟରେ କ୍ରମାଗତ ସାମ୍ନାକୁ ଆସୁଛି ଭୟାବହ ସ୍ଥିତି । ତାଲିବାନ ରାଜର ପ୍ରତ୍ୟାବର୍ତ୍ତନ ଭୟରେ ଆଫଗାନିସ୍ତାନର ହଜାର ହଜାର ଲୋକେ ତକାବୁଲ ବିମାନବନ୍ଦର ଆଡକୁ ଦୌଡୁଛନ୍ତି । କେବଳ ଏତିକି ନୁହେଁ, ଆଫଗାନିସ୍ତାନରୁ ପଳାୟନ କରି ଅନ୍ୟ ଦେଶରେ ଶରଣ ନେବା ପାଇଁ କିଛି ଲୋକ ନିଜ ଜୀବନକୁ ମଧ୍ୟ ବାଜି ଲଗାଇଦେଇଛନ୍ତି ।