ଇସଲାମାବାଦ: ସାମୂହିକ ପ୍ରାର୍ଥନା, ମସଜିଦରେ ଭିଡ ଆଦି ନିୟମ ଉଲଙ୍ଘନକାରୀ କାର୍ଯ୍ୟକଳାପ ପରେ ପାକିସ୍ତାନରେ ବଢିବାରେ ଲାଗିଛି କୋରୋନା ଆକ୍ରାନ୍ତଙ୍କ ସଂଖ୍ୟା । ଗତ 24 ଘଣ୍ଟା ମଧ୍ୟରେ ପାକିସ୍ତାନରେ 989 ପଜିଟିଭ ଚିହ୍ନଟ ହୋଇଛନ୍ତି । ଯାହା ଦେଶରେ ମୋଟ ଆକ୍ରାନ୍ତଙ୍କ ସଂଖ୍ୟା 19ହଜାରକୁ ବଢାଇଛି । ସେପଟେ ଏହି ସମୟ ମଧ୍ୟରେ 23 ଜଣଙ୍କ ମୃତ୍ୟୁ ସହ ମୋଟ ମୃତକଙ୍କ ସଂଖ୍ୟା 440ରେ ପହଞ୍ଚିଛି ।
ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଜାରି ସୂଚନା ମୁତାବକ ବର୍ତ୍ତମାନ ସୁଦ୍ଧା ଦେଶରେ 4817 ଜଣ ଲୋକେ ସମ୍ପୂର୍ଣ୍ଣ ସୁସ୍ଥ ହୋଇ ଘରକୁ ଫେରିଛନ୍ତି । ସେପଟେ ଚିହ୍ନଟ 19,103 ଜଣ ଆକ୍ରାନ୍ତଙ୍କ ମଧ୍ୟରୁ ପଞ୍ଜାବ ପ୍ରାନ୍ତରେ 7106, ସିନ୍ଧରେ 7102, ଖୈବର-ପଖତୁଙ୍ଖୱାରେ 2907, ବାଲୋଚିସ୍ତାନରେ 1172, ଇସଲାମାବାଦରେ 393, ଗିଲଗିଟ ବାଲତିସ୍ତାନରେ 356 ଓ ପାକିସ୍ତାନ ଅଧିକୃତ କଶ୍ମୀରରେ 67ଟି ମାମଲା ରହିଛି । ଏଯାବତ ଦେଶରେ 2,03,025ଟି ଟି ଟେଷ୍ଟିଂ ସରିଛି । ଯେଉଁଥିରୁ ଗତ 24 ଘଣ୍ଟାରେ 8716ଟି ଟେଷ୍ଟିଂ କରାଯାଇଛି ।
ସେପଟେ ଶନିବାର ଦେଶରେ କୋରୋନା ସ୍ଥିତି ନେଇ ପ୍ରଧାନମନ୍ତ୍ରୀ ଇମରାନ ଖାନ ଗଣମାଧ୍ୟମକୁ ସୂଚନା ଦେଇ କହିଛନ୍ତି କି ଦେଶରେ କେବେ କୋରୋନା ପାଇଁ ଟୀକା ଉପଲବ୍ଧ ହେବ ତାହା ସ୍ପଷ୍ଟ ହୋଇ ନାହିଁ । ତେଣୁ ଆଗାମୀ 6 ମାସ କିମ୍ବା ବର୍ଷେ ପର୍ଯ୍ୟନ୍ତ ଦେଶରେ ଏପରି ସ୍ଥିତି ଲାଗି ରହିପାରେ ବୋଲି ସେ ଆଶଙ୍କା ପ୍ରକାଶ କରିଛନ୍ତି । ସେ ଏହା ମଧ୍ୟ କହିଛନ୍ତି କି କୋରୋନା ବିରୋଧରେ ଏହି ଯୁଦ୍ଧ ଜିତିବାକୁ ହେଲେ ଆମକୁ ଏକାଠି ହୋଇ ବୁଦ୍ଧିମତାର ସହ କାର୍ଯ୍ୟ କରିବାକୁ ହେବ ।