ୱାଶିଂଟନ:ଆଫଗାନିସ୍ତାନକୁ କବଜା କରିସାରିଛି ତାଲିବାନ । ଚାରିଆଡେ ଭୟର ବାତାବରଣ । ଦୀର୍ଘ ୨୦ ବର୍ଷ ପୁରୁଣା ଅସ୍ତିତ୍ବ ଫେରିପାଇଛି ତାଲିବାନ । ହେଲେ ତାଲିବାନଠାରୁ ବି ରହିଛି ଆହୁରି ବଡ ବିପଦ । ଯାହାକୁ ନେଇ ବଡ ବୟାନ ଦେଇଛନ୍ତି ଆମେରିକା ରାଷ୍ଟ୍ରପତି ଜୋ ବାଇଡେନ ।
ଆମେରିକା ରାଷ୍ଟ୍ରପତି ଜୋ ବାଇଡେନ କହିଛନ୍ତି, ଆଫଗାନିସ୍ତାନରେ ତାଲିବାନ କ୍ଷମତାକୁ ଆସିବା ସତ୍ତ୍ବେ ଅଲ-କାଏଦା ଏବଂ ଅନ୍ୟ ଅନୁବନ୍ଧିତ ଆତଙ୍କୀ ସଂଗଠନର ବିପଦ ନଜର ଆସୁଛି । ଏଥି ସହିତ ବାଇଡେନ କହିଛନ୍ତି ଯେ ଆଫଗାନିସ୍ତାନରେ ଆମେରିକାର ସାମରିକ ଶକ୍ତି ଉପରେ ଧ୍ୟାନକେନ୍ଦ୍ରୀତ କରିବା ଯୁକ୍ତିଯୁକ୍ତ ନୁହେଁ ।
ବାଇଡେନ ସିରିଆ ଏବଂ ପୂର୍ବ ଆଫ୍ରିକାର ନାଁ ନେଇଛନ୍ତି ଯେଉଁଠାରେ ଇସଲାମିକ ଷ୍ଟେଟ ସମୂହ ଆଫଗାନିସ୍ତାନ ଅପେକ୍ଷା ଏକ ବଡ ବିପଦ ହୋଇ ଛିଡାହୋଇଛନ୍ତି । ସେ କହିଛନ୍ତି ଯେ ଆଇଏସଆଇଏସ କାୟାବିସ୍ତାର କରିସାରିଛି । ସିରିଆ ଭଳି ସ୍ଥାନରେ ଆମେରିକାର ସାମରିକ ଶକ୍ତିର ଉପସ୍ଥିତି ନାହିଁ, କିନ୍ତୁ ସେମାନଙ୍କ ପାଖରେ ଆତଙ୍କୀଙ୍କୁ ଘଉଡାଇବାର କ୍ଷମତା ଅଛି ବୋଲି ନିଜ ବୟାନରେ କହିଛନ୍ତି ବାଇଡେନ ।
ଆମେରିକା ଚ୍ୟାନେଲକୁ ଦେଇଥିବା ଏକ ସାକ୍ଷାତକାରରେ ବାଇଡେନ କହିଛନ୍ତି, ତାଲିବାନ ବିଶ୍ବ ମଞ୍ଚରୁ ବୈଧ ସରକାରର ମାନ୍ୟତା ଚାହୁଁଛି କି ନାହିଁ ତାହା ଏଯାଏଁ ସ୍ପଷ୍ଟ ହୋଇନାହିଁ । ତେବେ ତାଲିବାନ ବଦଳିନି ବୋଲି ଜୋର ଦେଇ କହିଛନ୍ତି ବାଇଡେନ ।
