ୱାଶିଂଟନ: ଆସୁଛି ଆମେରିକାର ସ୍ବାଧୀନତା ଦିବସ । ଚଳିତବର୍ଷ କୋରୋନା ସଂକ୍ରମଣ ପାଇଁ ସାଲ୍ୟୁଟ ଆମେରିକା କାର୍ଯ୍ୟ ହେବା ନହେବା ନେଇ ସନ୍ଦେହ ପ୍ରକାଶ ପାଇଥିବା ବେଳେ ସମସ୍ତ କଳ୍ପନା ଜଳ୍ପନାର ଅନ୍ତ ଘଟାଇ କାର୍ଯ୍ୟକ୍ରମକୁ ଗ୍ରୀନ ସିଗନାଲ ଦେଇଥିଲେ ରାଷ୍ଟ୍ରପତି ଟ୍ରମ୍ପ । ହ୍ବାଇଟ ହାଉସ ପକ୍ଷରୁ ଏନେଇ ବିଧିବଦ୍ଧ ଘୋଷଣା କରାଯାଇଥିଲା । ଏହା ଟ୍ରମ୍ପ ନେତୃତ୍ବାଧୀନରେ ହେବାକୁ ଥିବା ଦ୍ବିତୀୟ ବର୍ଷ କାର୍ଯ୍ୟକ୍ରମ ।
ତେବେ ଚଲିତବର୍ଷର ସାଲ୍ୟୁଟ ଆମେରିକା କାର୍ଯ୍ୟକ୍ରମରେ ଟ୍ୟାଙ୍କ କିମ୍ବା କୌଣସି ଯୁଦ୍ଧ ସାମଗ୍ରୀର ପ୍ରଦର୍ଶନ ହେବ ନାହିଁ ବୋଲି ସୋମବାର ସ୍ପଷ୍ଟ ହୋଇଛି । ୱାଶିଂଟନରେ କାର୍ଯ୍ୟକ୍ରମର ପ୍ରଦର୍ଶନୀ ହେବା ନେଇ ସ୍ଥିର ହୋଇଥିବା ବେଳେ ଏଥିରେ ଦେଶରେ କୌଣସି ଯୁଦ୍ଧ ସାମଗ୍ରୀର ପ୍ରଦର୍ଶନ ହେବ ନାହିଁ ବୋଲି ପ୍ରତିରକ୍ଷା ମନ୍ତ୍ରଣାଳୟ ସ୍ପଷ୍ଟ କରିଛି । ପ୍ରତିରକ୍ଷା ସଚିବ ମାର୍କ ଏସ୍ପର ଗତ ସପ୍ତାହରେ ଅନ୍ତରୀଣ ବିଭାଗକୁ ଅନୁମତି ଦେଇ ଚଳିତବର୍ଷର ସାଲ୍ୟୁଟ ଆମେରିକା କାର୍ଯ୍ୟକ୍ରମ ପାଇଁ ଏରିଆଲ, ମ୍ୟୁଜିକାଲ ଓ କାର୍ଯ୍ୟକ୍ରମ ଆୟୋଜନ ଆଧାରରେ ସମସ୍ତ ସହଯୋଗ ଯୋଗାଇବା ପାଇଁ ସ୍ପଷ୍ଟ କରିଥିଲେ ।