ୱାଶିଂଟନ: ଆମେରିକାରେ ବିପର୍ଯ୍ୟୟ ଭାବେ ପରିଣତ ହୋଇଥିବା କୋରୋନା ସ୍ଥିତିକୁ ନେଇ ନିକଟରେ ଏକ ସର୍ଭେ ହୋଇଥିଲା । ଯେଉଁଥିରେ ଦେଖାଯାଇଥିଲା କି ମାତ୍ର 34 ପ୍ରତିଶତ ଆମେରିକୀୟ ନାଗରିକ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଶାସନ ପ୍ରକ୍ରିୟା ଓ ବିପର୍ଯ୍ୟୟ ସ୍ଥିତି ମୁକାବିଲାକୁ ସମର୍ଥନ କରିଛନ୍ତି । ବଳକା ନାଗରିକ କିନ୍ତୁ ଟ୍ରମ୍ପଙ୍କ ଏହି ଆଭିମୁଖ୍ୟକୁ କଡା ବିରୋଧ କରିଥିବା ଦେଖାଯାଇଛି ।
କେବଳ କୋରୋନା ସ୍ଥିତି ନୁହେଁ ବରଂ ଦେଶରେ ନିକଟରେ ଘଟିଥିବା ଅନ୍ୟ ସମସ୍ତ ଘଟଣା ପାଇଁ ମଧ୍ୟ ଟ୍ରମ୍ପଙ୍କ ଦାୟୀ ଭାବି ତାଙ୍କର ଆଭିମୁଖ୍ୟକୁ ବିରୋଧ କରିଛନ୍ତି ସାଧାରଣ ଜନତା । ସେ ଜର୍ଜ ଫ୍ଲଏଡଙ୍କ ମୃତ୍ୟୁ ହେଉ କି ଜର୍ଜଙ୍କ ମୃତ୍ୟୁକୁ ନେଇ ଦେଶରେ ନିଆଁ ପରି ବ୍ୟାପିଥିବା ଆନ୍ଦୋଳନ, ପ୍ରତ୍ୟେକ କ୍ଷେତ୍ରରେ ଟ୍ରମ୍ପଙ୍କ ଆଭିମୁଖ୍ୟ ଦେଶବାସୀଙ୍କୁ ବ୍ୟଥିତ କରିଥିବା ସର୍ଭେରୁ ସ୍ପଷ୍ଟ ହୋଇଥିଲା । ଏନେଇ ଆମେରିକୀକ ଇପସୋସ ପୋଲ ଏହି ସର୍ଭେ ପରିଚାଳିତ କରିଥିଲା ।