Published : Oct 30, 2023, 7:34 PM IST
ମୁମ୍ବାଇ: ବିବାଦ ଘେରରେ ବଲିଉଡ ରାପର ବାଦଶାହା । ଅନଲାଇନ ବେଟିଂ କମ୍ପାନୀ ଆପ୍ ଫେୟାରପ୍ଲେ ମାମଲାରେ ରାପର ବାଦଶାହାଙ୍କ ନାଁ ଜଡିତ ଥିବା ସୂଚନା ମିଳିଛି । ସେ ଏହି ଆପକୁ ପ୍ରମୋସନ କରିଥିଲେ । ଘଟଣା ନେଇ ବାଦଶାହାଙ୍କୁ ମହାରାଷ୍ଟ୍ର ପୋଲିସର ସାଇବର ସେଲ୍ ପଚରାଉଚରା ପାଇଁ ସମନ କରିଥିଲା । ଆଜି ବାଦଶାହା ସାଇବର ସେଲ୍ କାର୍ଯ୍ୟାଳୟରେ ପହଞ୍ଚିବା ପରେ ତାଙ୍କୁ ପଚରାଉଚରା କରାଯାଇଛି । ସୂଚନା ଅନୁସାରେ, ଏହି ମାମଲାରେ ବାଦଶାହାଙ୍କ ସମେତ 40 ଜଣ ସେଲିବ୍ରିଟି ଫେୟାରପ୍ଲେ ଆପକୁ ପ୍ରୋତ୍ସାହିତ କରିଥିବା ଜଣାପଡିଛି । ସେମାନଙ୍କୁ ମଧ୍ୟ ପଚରାଉଚରା କରାଯିବ ବୋଲି ଜଣାପଡିଛି ।
ପୁରା ମାମଲା କ'ଣ?
ମହାଦେବ ଆପର ସହାୟକ ଆପ୍ ଫେୟାରପ୍ଲେ ଆପ୍ କୁ ପ୍ରୋତ୍ସାହିତ କରିବା ପାଇଁ ଗାୟକ-ରାପରଙ୍କୁ ଡକାଯାଇଥିଲା । ପ୍ରାଥମିକ ସୂଚନା ଅନୁଯାୟୀ, ଫେୟାରପ୍ଲେ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍) 2023 ସ୍କ୍ରିନ କରିଥିଲା ଏବଂ Viacom18 ଏହି ଆପ୍ ବିରୋଧରେ ଅଭିଯୋଗ ଦାଖଲ କରିଥିଲା । (ଆଇପିଏଲ୍) 2023 ପ୍ରସାରଣ କରିବାର ଅଧିକାର Viacom18 ପାଖରେ ଥିଲା । ଷ୍ଟ୍ରିମିଂ ପାଇଁ କୌଣସି ଅନୁମତି ନଥିବା ପରେ ବି ମାର୍ଚ୍ଚ 2023 ରୁ ମେ 2023 ପର୍ଯ୍ୟନ୍ତ ଏହି ଫେୟାରପ୍ଲେ କ୍ରିକେଟ୍ ଟୁର୍ଣ୍ଣାମେଣ୍ଟକୁ ନିଜ ପ୍ଲାଟଫର୍ମରେ ପ୍ରସାରଣ କରିଥିଲା । ମହାରାଷ୍ଟ୍ର ପୋଲିସର ସାଇବର ସେଲ୍ ଦ୍ବାରା ଦାଖଲ କରାଯାଇଥିବା ଅଭିଯୋଗରେ ଫେୟାରପ୍ଲେ ବିରୋଧରେ କପିରାଇଟ ମାମଲା ରୁଜୁ ହୋଇଛି । ତେବେ ଏହି ଆପକୁ ସମର୍ଥନ କରିବା ହେତୁ ବାଦଶାହାଙ୍କୁ ପଚରାଉଚରା ପାଇଁ ଡକାଯାଇଛି ।
ଏହା ମଧ୍ୟ ପଢନ୍ତୁ:ଫେକ୍ ଫଲୋୟର୍ସ ରାକେଟ, ରାପର ବାଦଶାହାଙ୍କୁ କ୍ରାଇମବ୍ରାଞ୍ଚର ସମନ
ସୂଚନା ଥାଉ କି, ଫେୟାରପ୍ଲେ ଆପକୁ ସୌରଭ ଚନ୍ଦ୍ରାକର ଏବଂ ରବି ଉପ୍ପଲଙ୍କ ଦ୍ୱାରା ପ୍ରସାରିତ । ବାଦଶାହାଙ୍କ ସମେତ ଅନେକ ସେଲିବ୍ରିଟି ଏହି ଆପକୁ ପ୍ରୋତ୍ସାହିତ କରିଥିଲେ । ଏହି ମାମଲାରେ ବାଦଶାହଙ୍କ ସମେତ 40 ଜଣ ସେଲିବ୍ରିଟି ଫେୟାରପ୍ଲେ ଆପକୁ ପ୍ରୋତ୍ସାହିତ କରିଥିବା ଜଣାପଡିଛି । ଏହି ମାମଲାରେ କେଉଁ କେଉଁ ସେଲିବ୍ରିଟି ଜଡିତ ଅଛନ୍ତି ଯାହାକୁ ସାଇବର ସେଲ ପଚରାଉଚରା କରିବ ତାହା ଜଣାପଡିନାହିଁ । କିନ୍ତୁ ପୂର୍ବରୁ ମହାଦେବ ଆପ ବିରୋଧରେ ମନି ଲଣ୍ଡରିଂ ମାମଲା ରୁଜୁ ହୋଇଥିଲା । ଯେଉଁଥିରେ ବଲିଉଡ ଅଭିନେତା ରଣବୀର କପୁର, ହୁମା କୁରେଶି, କପିଲ ଶର୍ମା ଏବଂ ଶ୍ରଦ୍ଧା କପୁରଙ୍କ ନାଁ ଜଡିତ ଥିଲା ।
