ମୁମ୍ବାଇ: ଏଣ୍ଟରଟେନମେଣ୍ଟ ଜଗତ ଉପରେ ଖସି ପଡିଛି ଦୁଃଖର କଳା ବାଦଲ । ଆଜି ସାଉଥ୍ ଫିଲ୍ମ ଇଣ୍ଡଷ୍ଟ୍ରିର ଭେଟେରାନ୍ ଅଭିନେତା ଶରତ ବାବୁ ଅଫେରା ରାଇଜକୁ ଚାଲିଯାଇଥିବା ବେଳେ, ଇଣ୍ଡଷ୍ଟ୍ରିରେ ଶୋକର ଲହରି ଖେଳିଯାଇଥିଲା । ଏହି ଦୁଃଖଦ ଖବର ପରେ ଆଉ ଏକ ଅତ୍ୟନ୍ତ ଦୁଃଖଦ ଖବର ସାମ୍ନାକୁ ଆସିଛି । ଯାହା ଏଣ୍ଟଟେନମେଣ୍ଟ ଇଣ୍ଡଷ୍ଟ୍ରିର ଦୁଃଖକୁ ଦୁଇଗୁଣ କରି ଦେଇଛି । ବଲିଉଡର ଅଭିନେତା, ମଡେଲ ଏବଂ କାଷ୍ଟିଂ ସଂଯୋଜକ ଆଦିତ୍ୟ ସିଂ ରାଜପୁତଙ୍କ ମୃତଦେହ ମିଳିବା ଖବର ପରେ ଶୋକାକୂଳ ହୋଇ ଉଠିଛି ବଲିଉଡ ଇଣ୍ଡଷ୍ଟ୍ରି ।
ସୂଚନାନୁଯାୟୀ, ଆଦିତ୍ୟ ସିଂ ରାଜପୁତ ମୁମ୍ବାଇର ଅନ୍ଧେରିରେ ଅବସ୍ଥିତ ତାଙ୍କ ଆପାର୍ଟମେଣ୍ଟର ୱାଶରୁମରେ ଅଭିନେତାଙ୍କ ମୃତଦେହ ମିଳିଥିଲା । ତାଙ୍କ ବନ୍ଧୁ ତାଙ୍କୁ ବାଥରୁମ ଘରେ ଅଚେତ ଅବସ୍ଥାରେ ପଡିଥିବା ଦେଖିବାକୁ ପାଇଥିଲେ । ଯାହା ପରେ ସେ ବିଲ୍ଡିଂର ସୁରକ୍ଷା କର୍ମୀଙ୍କ ସହଯୋଗରେ ତାଙ୍କୁ ଡାକ୍ତରଖାନା ନେଇଥିଲେ । ସେଠାରେ ପହଞ୍ଚିବା ପରେ ଡାକ୍ତରମାନେ ତାଙ୍କୁ ପରୀକ୍ଷା କରିବା ପରେ ମୃତ ଘୋଷଣା କରିଥିଲେ । ଅତ୍ୟଧିକ ନିଶା ସେବନ ହେତୁ ଅଭିନେତାଙ୍କର ମୃତ୍ୟୁ ହୋଇଥିବା ପୋଲିସ ସନ୍ଦେହ କରିଛି । ଆଦିତ୍ୟ ସିଂ ରାଜପୁତ ଜଣେ ଲୋକପ୍ରିୟ ମଡେଲ ଏବଂ ଅଭିନେତା ଥିଲେ । ସେ ଗନ୍ଦିବାତ ଏବଂ ସ୍ପ୍ଲିଟଭିଲ୍ଲା ରିଆଲିଟି ସିରିଏଲରେ ନଜର ଆସିଛନ୍ତି । ଏହି ଦୁଇଟି ସିରିଏଲ ପାଇଁ ସେ ବେଶ ଲୋକ ପ୍ରିୟତା ହାସଲ କରିଥିଲେ । ତେବେ ଆଦିତ୍ୟଙ୍କ ଇନଷ୍ଟାଗ୍ରାମ କାହାଣୀରୁ ଜଣାପଡିଛି ଯେ ସେ ଗତକାଲି ରାତିରେ ନିଜ ସାଙ୍ଗମାନଙ୍କ ସହିତ ଘରେ ଥିଲେ । ସେ ତାଙ୍କ ସାଙ୍ଗ ସହ ଏକ ମସ୍ତିୱାଲା ଭିଡିଓ ସେୟାର କରିଥିଲେ ।