ହାଇଦ୍ରାବାଦ: ଚଳିତ ବର୍ଷ ସଲମାନ ଖାନ, ପ୍ରଭାସଙ୍କ ଭଳି ଅନେକ ସୁପରଷ୍ଟାରଙ୍କ ଫିଲ୍ମ ରିଲିଜ ହୋଇଛି । ଏହି ଫିଲ୍ମଗୁଡିକ ବିଗ୍ ବଜେଟରେ ବି ନିର୍ମିତ ହୋଇଛି । ସଲମାନ ଖାନଙ୍କ ଫିଲ୍ମ କିସି କା ଭାଇ କିସି କି ଜାନ, ପ୍ରଭାସଙ୍କ ଫିଲ୍ମ ଆଦିପୁରୁଷ, କାର୍ତ୍ତିକ ଆର୍ଯ୍ୟନଙ୍କ ଶେହଜାଦା, ଅକ୍ଷୟ କୁମାରଙ୍କ ସେଲ୍ଫି ଭଳି ଅନେକ ଫିଲ୍ମ ବକ୍ସ ଅଫିସରେ ରିଲିଜ କରିଥିଲା । ହେଲେ ଏହି ଫିଲ୍ମଗୁଡିକ ଦର୍ଶକଙ୍କୁ ଆକୃଷ୍ଟ କରିବାରେ ବିଫଳ ହୋଇଛି । ହାଇ ବଜେଟ୍ ସହ ନାମୀଦାମୀ ତାରକା ହେବା ସତ୍ତ୍ବେ ଫିଲ୍ମଗୁଡିକ ସୁପର୍ ଫ୍ଲପ୍ ପ୍ରମାଣିତ ହୋଇଛି ।
ଓମ ରାଉତ୍ଙ୍କ ନିର୍ଦ୍ଦେଶିତ ଆଦିପୁରୁଷ ଚଳଚ୍ଚିତ୍ର ରାମାୟଣ ଉପରେ ଆଧାରିତ ଥିଲା । ଏହି ଚଳଚ୍ଚିତ୍ରର ବଜେଟ୍ ପ୍ରାୟ 700 କୋଟି ଥିଲା । ପ୍ରଭାସ କ୍ରିତି ସାନନଙ୍କ ସହ ସୈଫ ଅଲି ଖାନ ଭଳି ଷ୍ଟାର ଏହି ଫିଲ୍ମରେ ଅଭିନୟ କରିଥିଲେ । ଏହି ଫିଲ୍ମ 16 ଜୁନ୍ରେ ବଡ଼ ପରଦାରେ ମୁକ୍ତିଲାଭ କରିଥିଲା । ପ୍ରଥମ ଦିନରେ ଫିଲ୍ମଟି 86.75 କୋଟି ରୋଜଗାର କରିଥିଲା । ପରେ ବିବାଦୀୟ ସଂଳାପ ଏବଂ ଖରାପ VFX ଯୋଗୁଁ ଚଳଚ୍ଚିତ୍ରକୁ ଅନେକ ସମାଲୋଚନାର ସମ୍ମୁଖୀନ ହେବାକୁ ପଡ଼ିଲା। ଏହି ଫିଲ୍ମ ବକ୍ସ ଅଫିସରେ ମାତ୍ର 300 କୋଟି ରୋଜଗାର କରିବାରେ ସକ୍ଷମ ହୋଇଥିଲା । ଯାହା ଏକପ୍ରକାର ଫ୍ଲପ୍ ବୋଲି ପ୍ରମାଣିତ ହେଲା । ବର୍ତ୍ତମାନ ଏହି ଚଳଚ୍ଚିତ୍ରଟି ତାମିଲ, ମାଲାୟାଲମ୍, ତେଲୁଗୁ, ହିନ୍ଦୀ ଏବଂ ଅନ୍ୟାନ୍ୟ ଭାଷାରେ OTT ପ୍ଲାଟଫର୍ମରେ ରିଲିଜ ହୋଇଛି ।
ସେହିପରି 'କିସି କା ଭାଇ କିସି କି ଜାନ୍' ଫରହାଦ୍ ସାମଜୀଙ୍କ ନିର୍ଦ୍ଦେଶିତ ତାମିଲ ଚଳଚ୍ଚିତ୍ର ଭୀରମର ରିମେକ୍ ଅଟେ । ସଲମାନ ଖାନଙ୍କ ଏହି ଫିଲ୍ମ 21 ଏପ୍ରିଲରେ ଇଦ୍ ଅବସରରେ ରିଲିଜ କରିଥିଲା । ସଲମାନ ଖାନ, ପୂଜା ହେଗଡେ, ଭୂମିକା ଚାୱଲା, ଭେଙ୍କଟେଶ ଭଳି ତାରକା ଏହି ଫିଲ୍ମରେ କାମ କରିଥିଲେ । ସଲମାନ ଖାନଙ୍କ ଏହି ଆକ୍ସନ୍ ଫିଲ୍ମର ପୁରା ବଜେଟ୍ 132.5 କୋଟିର ଥିଲା । ଏହି ଫିଲ୍ମ ଭଲ ପ୍ରଦର୍ଶନ କରିବାରେ ବିଫଳ ହେଲା । ଏବଂ ଚଳଚ୍ଚିତ୍ରର ମୋଟ ରୋଜଗାର ପ୍ରାୟ 175.25 କୋଟି ପାଖାପାଖି ରହିଥିଲା ।