ମୁମ୍ବାଇ:ନିଜର ପ୍ରଥମ ସନ୍ତାନକୁ ସ୍ବାଗତ କରିବାକୁ ଅନାଇ ବସିଛନ୍ତି ଟେଲି ଅଭିନେତ୍ରୀ ସନା ଖାନ । ଏହାରି ମଧ୍ୟରେ ବାବା ସିଦ୍ଦିକିଙ୍କ ଗ୍ରାଣ୍ଡ ଇଫତାର ପାର୍ଟିରେ ସନା ଏବଂ ତାଙ୍କ ସ୍ବାମୀ ମୁଫତି ଅନସଙ୍କୁ ଦେଖିବାକୁ ମିଳିଥିଲା । ପାର୍ଟିରେ ସନାଙ୍କ ବେବି ବମ୍ପ ଦେଖିବାକୁ ମିଳିଥିଲା । ତେବେ ଏହି ପାର୍ଟିର ଉଭୟଙ୍କ ଏକ ଭିଡିଓ ବେଶ ଭାଇରାଲ ହେବାରେ ଲାଗିଛି । ଯେଉଁଥିରେ ଅନସ ସନାଙ୍କ ହାତ ଧରି ଦ୍ରୁତ ଗତିରେ ଭିତରକୁ ଯାଉଥିବାର ଦେଖିବାକୁ ମିଳିଛି । ଯାହାକୁ ନେଇ ସ୍ବାମୀ ଅନସ ଟ୍ରୋଲର ଶିକାର ହୋଇଛନ୍ତି । ଟ୍ରୋଲ ହେବା ପରେ ଏନେଇ ପ୍ରତିକ୍ରିୟା ରଖିଛନ୍ତି ସନା ।
ରବିବାର ସନ୍ଧ୍ୟାରେ ବାବା ସିଦ୍ଦିକିଙ୍କ ଆୟୋଜିତ ଇଫତାର ପାର୍ଟିରେ ସନା ଏବଂ ତାଙ୍କ ସ୍ବାମୀ ମୁଫତି ଅନସ ସାମିଲ ହୋଇଥିଲେ । ଏହି ସମୟରେ ପାପରାଜିଙ୍କୁ ସନା ଏବଂ ତାଙ୍କ ସ୍ବାମୀ ମୁଫତି ଅନସ ଅନେକ ପୋଜ ଦେଇଥିଲେ । ଏହା ପରେ, ପାପାରାଜିଙ୍କ ସାମ୍ନାରେ ଅନସ ତାଙ୍କ ପତ୍ନୀ ସନାଙ୍କୁ ହାତ ଧରି ଶୀଘ୍ର ଭିତରକୁ ନେଇ ଯାଉଥିବାର ଦେଖିବାକୁ ମିଳିଥିଲା । ଏବଂ ସେହି ସମୟରେ ସନା, 'ମୁଁ ଏତେ ଚାଲିବାକୁ ସମର୍ଥ ହେବି ନାହିଁ' ବୋଲି କହୁଥିବା ଶୁଣିବାକୁ ମିଳିଛି । ଯାହାର ଭିଡିଓ ପାପାରାଜିଙ୍କ କ୍ୟାମେରାରେ କଏଦ ହୋଇଥିଲା । ତେବେ ସନାଙ୍କର ଏହି ଭିଡିଓକୁ ପାପାରାଜି ତାଙ୍କ ଇନଷ୍ଟାଗ୍ରାମରେ ସେୟାର କରିଛନ୍ତି । ଯାହା ବର୍ତ୍ତମାନ ମୋବାଇଲକୁ ମୋବାଇଲ ଘୂରି ବୁଲୁଛି ।
ଏହି ଭିଡିଓ ସାମ୍ନାକୁ ଆସିବା ପରେ ଫ୍ୟାନ୍ସମାନେ ଅନାସଙ୍କ ମନୋଭାବକୁ ନେଇ ଅସନ୍ତୋଷ ବ୍ୟକ୍ତ କରିଥିଲେ । ଏନେଇ ଜଣେ ଫ୍ୟାନ୍ସ ଲେଖିଛନ୍ତି, 'ଏହି ବ୍ୟକ୍ତି ତାଙ୍କୁ କାହିଁକି ଟାଣି ନେଉଛନ୍ତି' । ଅନ୍ୟ ଜଣେ ଲେଖିଛନ୍ତି, ଆରାମରେ, ସେ ତୁମର ପତ୍ନୀ । ' ଅନ୍ୟ ଜଣେ ଲେଖିଛନ୍ତି, 'ହେ ଭଗବାନ । ଯେତେବେଳେ ତୁମେ ତୁମର ଗର୍ଭବତୀ ପତ୍ନୀଙ୍କ ସଠିକ୍ ଯତ୍ନ ନେଇପାରିବ ନାହିଁ, ଉପବାସ କାହିଁକି କରୁଛନ୍ତି? କଳ୍ପନା କରନ୍ତୁ ତାଙ୍କ ସହ 4 କାନ୍ଥ ମଧ୍ୟରେ କିପରି ବ୍ୟବହାର କରାଯାଉଥିବ । ସେହିପରି ଅନ୍ୟ ଜଣେ ଲେଖିଛନ୍ତି, 'ସେ ଗର୍ଭବତୀ ଏବଂ ସେ ପ୍ରକୃତରେ ତାଙ୍କୁ ଟାଣି ନେଉଛନ୍ତି । ସେ ତାଙ୍କ ଉପରେ ଅଭିଯୋଗ ମଧ୍ୟ କରୁଛନ୍ତି ଯେ ସେ ଏତେ ଚାଲିପାରିବେ ନାହିଁ ।
ସେପଟେ ଘଟଣା ନେଇ ସ୍ପଷ୍ଟ କରିଛନ୍ତି ସନା । ଅନାସଙ୍କୁ ଟ୍ରୋଲ କରାଯାଉଥିବା ଦେଖି ସନା ପ୍ରତିକ୍ରିୟା ଦେଇ କହିଛନ୍ତି, ଏହି ଭିଡିଓ ବର୍ତ୍ତମାନ ମୋ ନଜରକୁ ଆସିଛି । ମୁଁ ଜାଣିଛି, ଏହା ମୋର ସମସ୍ତ ପ୍ରିୟ ଭାଇ ଓ ଭଉଣୀମାନଙ୍କ ପାଇଁ ଅଜବ ଲାଗୁଥିବ । ହେଲେ ଆପଣ ଯାହା ଭାବୁଛନ୍ତି ଘଟଣା ତାହା ନୁହେଁ । ପାର୍ଟିରୁ ଥରେ ବାହାରକୁ ଆସିବା ପରେ ଆମେ ଡ୍ରାଇଭର ସହ ସମ୍ପର୍କ କରିପାରିଲୁ ନାହିଁ । ମୁଁ ବହୁତ ସମୟ ଛିଡା ହେଲି, ଯେଉଁଥିପାଇଁ ମୁଁ ସାମାନ୍ୟ ଅସୁସ୍ଥତା ଅନୁଭବ କଲି । ତେଣୁ ସେ ମୋତେ ଶୀଘ୍ର ଭିତରକୁ ନେବାକୁ ଚାହୁଁଥିଲେ । ଯାହାଫଳରେ ମୁଁ ଭିତରେ ବସି ପାଣି ପିଇ ପାରିବି । ସେ ଆହୁରି ମଧ୍ୟ କହିଛନ୍ତି ଯେ, ମୁଁ ହିଁ ତାଙ୍କୁ କହିଥିଲି ଯେ ଚାଲ ଶୀଘ୍ର ଯିବା । ତେଣୁ ଅନୁରୋଧ କରୁଛି ଦୟାକରି ଆପଣମାନେ ଅଯଥା କଥା ଭାବନ୍ତୁ ନାହିଁ । ଆପଣଙ୍କ ଚିନ୍ତା ପାଇଁ ମୁଁ ପୁଣି ଥରେ ସମସ୍ତଙ୍କୁ ଧନ୍ୟବାଦ ଜଣାଉଛି । ଏବଂ ସମସ୍ତଙ୍କୁ ବହୁତ ଭଲ ପାଇବା ।'
ସୂଚନା ଥାଉ କି, ତେବେ ପାର୍ଟିରେ ସନା ବୁର୍ଖାରେ ନଜର ଆସିଥିବା ବେଳେ ସ୍ବାମୀ ମୁଫତି ଅନସଙ୍କୁ ୱାଇଟ କୁର୍ତ୍ତା, ପାଇଜାମା ସହ ବ୍ଲାକ କୋର୍ଟରେ ଦେଖିବାକୁ ମିଳିଥିଲା । ସେପଟେ ଏହି ଗ୍ରାଣ୍ଡ ପାର୍ଟିରେ 'କିସି କା ଭାଇ କିସି କି ଜାନ'ର କାଷ୍ଟଙ୍କ ମଧ୍ୟ ଦେଖିବାକୁ ମିଳିଥିଲା । ପାର୍ଟିରେ ବଲିଉଡ ସୁପରଷ୍ଟାର ସଲମାନ ଖାନ, ପୂଜା ହେଗଡେ, ଶେହନାଜ ଗିଲ, ସିଦ୍ଧାର୍ଥ, ରାଘବ ଜୁୟାଲ, ପଲକ ତିୱାରୀଙ୍କୁ ଦେଖିବାକୁ ମିଳିଥିଲା । ଏଥିସହ ଅଭିନେତା ଇମ୍ରାନ ହାସମି, କାଜୋଲ, ପ୍ରୀତି ଜିଣ୍ଟା, ସିଦ୍ଧାର୍ଥ ମଲହୋତ୍ରାଙ୍କ ସମେତ ବହୁ ଜଣାଶୁଣା ସେଲିବ୍ରିଟି ଗର୍ଜିୟସ ଲୁକରେ ନଜର ଆସିଥିଲେ ।
