ହାଇଦ୍ରାବାଦ: ବଲିଉଡ୍ ଅଭିନେତ୍ରୀ ପରିଣୀତି ଚୋପ୍ରାଙ୍କର ବହୁ ଚର୍ଚ୍ଚିତ ବାହାଘର ଆପ୍ ସାଂସଦ ରାଘବ ଚଢ଼ାଙ୍କ ସହ ନିକଟରେ ସପନ୍ନ ହୋଇଛି । ଦୁହିଁଙ୍କ ବିବାହରେ ପରିବାର ସଦସ୍ୟ, ଅନେକ ବଡ଼ବଡ଼ କଳାକାର ଓ ରାଜନେତା ଯୋଗ ଦେଇଥିଲେ । ଉଦୟପୁରର ପ୍ରସିଦ୍ଧ ଲୀଲା ପ୍ୟାଲେସ ହୋଟେଲ୍ରେ ଏହି ଚର୍ଚ୍ଚିତ ବିବାହ ଶେଷ ହେବା ପରେ ସେମାନଙ୍କର ଆକର୍ଷଣୀୟ ଫଟୋ ସୋସିଆଲ ମିଡିଆରେ ପୋଷ୍ଟ ହୋଇଥିଲା । ପରିଣୀତି ମଧ୍ୟ ବିବାହ ପରେ ରାଘବଙ୍କୁ ଏକ ବିଶେଷ ଉପହାର ଦେଇଛନ୍ତି । ଏହି ଉପହାର ସହିତ ପରିଣୀତି ନିଶ୍ଚିତ ଭାବରେ ରାଘବଙ୍କ ହୃଦୟ ଜିତିଥିବେ । ପରିଣୀତି ତାଙ୍କ ବିବାହରେ ରାଘବଙ୍କୁ ଏକ ଗୀତ ଉତ୍ସର୍ଗ କରିଛନ୍ତି ।
ବିବାହ ପୂର୍ବରୁ ପରିଣୀତି ରାଘବଙ୍କ ପାଇଁ ଏକ ଗୀତ ରେକର୍ଡ କରିଥିଲେ । ସେହି ଗୀତକୁ ସେ ବିବାହ ପରେ ରାଘବଙ୍କୁ ଡେଡିକେଟ୍ କରିଛନ୍ତି । ପରିଣୀତି ଚୋପ୍ରା ଜଣେ ମହାନ ଅଭିନେତ୍ରୀ ହେବା ସହିତ ଜଣେ ଭଲ ଗାୟିକା ମଧ୍ୟ । ସେ ବହୁତ ଭଲ ଗୀତ ଗାଆନ୍ତି ଏବଂ ସୋସିଆଲ ମିଡିଆରେ ଅନେକ ସମୟରେ ତାଙ୍କର ଗୀତ ଭିଡିଓ ସେୟାର କରନ୍ତି । ପରିଣୀତି ରାଘବଙ୍କ ପାଇଁ ‘ଓ ପିୟା’ ଗୀତ ଗାଇଛନ୍ତି ।
ଗୀତ ମାଧ୍ୟମରେ ପ୍ରେମ ବ୍ୟକ୍ତ କଲେ ପରିଣୀତି
ପରିଣୀତି ‘ଓ ପିୟା’ ଗୀତକୁ ରେକର୍ଡ କରି ରାଘବଙ୍କୁ ଉପହାର ସ୍ବରୁପ ଦେଇଛନ୍ତି । ଏହି ଗୀତରେ ପରିଣୀତି ରାଘବଙ୍କ ପ୍ରତି ନିଜର ପ୍ରେମ ବ୍ୟକ୍ତ କରିଛନ୍ତି । ଏହି ଗୀତକୁ ଗୌରବ ଦତ୍ତା ରଚନା କରିଛନ୍ତି ଏବଂ ଗୌରବ, ସନ୍ନି ଏମଆର ଏବଂ ହରଜୋତ କୌର ଲେଖିଛନ୍ତି । ‘ଓ ପିୟା ଓ ପିୟା ଚଲ ଚଲେ, ବାଟ୍ ଲେ ଗମ୍ ଖୁସୀ ସାଥ୍ ମେ....’ ଗୀତଟି ରାଘବଙ୍କୁ ମଧ୍ୟ ବହୁତ ପସନ୍ଦ ଆସିବ ।