ଲସ୍ ଆଞ୍ଜେଲସ: ହଲିଉଡ ଇଣ୍ଡଷ୍ଟ୍ରିରୁ ଆସିଲା ଦୁଃଖଦ ଖବର । ଓସ୍କାର ବିଜେତା ଲୁଇସ୍ ଫ୍ଲେଚରଙ୍କ (Louise Fletcher) ୮୮ ବର୍ଷ ବୟସରେ ଦେହାନ୍ତ ହୋଇଛି । ଏନେଇ ତାଙ୍କ ପରିବାର ସଦସ୍ୟ ସୂଚନା ଦେଇଛନ୍ତି । ଅଭିନେତ୍ରୀଙ୍କ ପରିବାର ସଦସ୍ୟ ନିଶ୍ଚିତ କରିଛନ୍ତି ଯେ, ଫ୍ରାନ୍ସର ମୋଣ୍ଟଡୁରସରେ ତାଙ୍କ ଘରେ ତାଙ୍କର ମୃତ୍ୟୁ ହୋଇଛି । ମିଲୋସ୍ ଫରମାନଙ୍କ ନିର୍ଦ୍ଦେଶିତ ୧୯୭୫ ଚଳଚ୍ଚିତ୍ର 'ୱାନ୍ ଫ୍ଲୁ ଓଭର ଦ କୁକୁସ୍ ନେଷ୍ଟ' (One Flew Over the Cuckoo's Nest) ରେ ନର୍ସ ରାଚେଡ୍ ଭୂମିକା ପାଇଁ ଲୁଇସ୍ ଫ୍ଲେଚର୍ ବେଶ୍ ଜଣାଶୁଣା । ଏହି ଚଳଚ୍ଚିତ୍ରରେ ଜ୍ୟାକ୍ ନିକୋଲସନ ମଧ୍ୟ ଅଭିନୟ କରିଥିଲେ ।
ଏହି ଭୂମିକା ପାଇଁ ସେ ୧୯୭୬ରେ ଶ୍ରେଷ୍ଠ ଅଭିନେତ୍ରୀ ପାଇଁ ଓସ୍କାର ଜିତିଥିଲେ। ଲୁଇସ୍ ୧୯୩୪ ଜୁଲାଇ ୨୨ରେ ଆମେରିକାର ଅଲବାମାର ଏକ ସହର ବର୍ମିଂଘମରେ ଜନ୍ମଗ୍ରହଣ କରିଥିଲେ । ତାଙ୍କ ପିତାମାତା ବଧିର ଥିଲେ । ଲୁଇସ୍ ୧୯୫୦ ଦଶକର ଶେଷ ଭାଗରେ ଲମାନ୍, ବ୍ୟାଟ୍ ମାଷ୍ଟର୍ସନ, ମାଭେରିକ୍, ଦ ଅନଟଚେବଲ୍ସ ଏବଂ ୭୭ ସନ୍ସେଟ୍ ଷ୍ଟ୍ରିପ୍ ଭଳି ଟିଭି ଧାରାବାହିକରେ ଅଭିନୟ କରି ନିଜର ଅଭିନୟ ଜୀବନ ଆରମ୍ଭ କରିଥିଲେ । ଲୁଇସ୍ ତାଙ୍କ ଅଭିନୟ କ୍ୟାରିୟରରେ ୬୦ ବର୍ଷରୁ ଅଧିକ ସମୟ ମଧ୍ୟରେ ଅନେକ ଚଳଚ୍ଚିତ୍ର ଏବଂ ଧାରାବାହିକରେ ଅଭିନୟ କରିଛନ୍ତି ।