ଲସ୍ ଆଞ୍ଜେଲସ୍:ହଲିଉଡ ଲୋକପ୍ରିୟ ଅଭିନେତା ମାଥ୍ୟୁ ପେରିଙ୍କର ଦେହାନ୍ତ ହୋଇଛି । ମୃତ୍ୟୁ ବେଳକୁ ତାଙ୍କୁ 54 ବର୍ଷ ବୟସ ହୋଇଥିଲା । ଲସ୍ ଆଞ୍ଜେଲସ୍ ଟାଇମ୍ସ ଏବଂ ସେଲିବ୍ରିଟି ୱେବସାଇଟ୍ ଟିଏମଜେ ଅନୁଯାୟୀ ଶନିବାର ତାଙ୍କ ଲସ୍ ଆଞ୍ଜେଲସ୍ ସ୍ଥିତ ଘରୁ ଏମି ପୁରସ୍କାର ପ୍ରାପ୍ତ ଅଭିନେତା ମାଥ୍ୟୁ ପେରିଙ୍କ ମୃତଦେହ ଉଦ୍ଧାର କରାଯାଇଥିଲା । ତାଙ୍କ ବିୟୋଗରେ ଇଣ୍ଡଷ୍ଟ୍ରି ଏବଂ ପରିବାରରେ ଶୋକର ଛାୟା ଖେଳିଯାଇଛି ।
ରିପୋର୍ଟ ଅନୁସାରେ, ଅଭିନେତାଙ୍କ ମୃତଦେହ ତାଙ୍କ ଘରର ବାଥଟବରୁ ମିଳିଥିଲା । ସେ ବାଥଟବରେ ବୁଡି ମୃତ୍ୟୁବରଣ କରିଥିବା କୁହାଯାଉଛି । ମାଥ୍ୟୁ 90 ଦଶକର ସିଟକମ୍ ସୁପର ହିଟ୍ ସିରିଜ୍ ଫ୍ରେଣ୍ଡସରେ ଚ୍ୟାଣ୍ଡଲର ବିଙ୍ଗ୍ ଭୂମିକାରେ ଅଭିନୟ କରିଥିଲେ । ତାଙ୍କ ଏପରି ଆଶ୍ଚର୍ଯ୍ୟଜନକ ଦେହାନ୍ତ ସମସ୍ତଙ୍କୁ ମର୍ମାହତ କରିଥିବା ବେଳେ ହଲିଉଡରୁ ଟଲିଉଡ ଅନେକ ସେଲିବ୍ରିଟି ଦୁଃଖ ପ୍ରକାଶ କରିବା ସହ ଶ୍ରଦ୍ଧାଞ୍ଜଳି ଜଣାଇଛନ୍ତି ।
ଟେଲିଭିଜନ ଜଗତରେ ପେରିଙ୍କ ମା' ଭାବରେ ପ୍ରସିଦ୍ଧ ମୋର୍ଗାନ ଫେୟାରଚାଇଲ୍ଡ ମଧ୍ୟ ତାଙ୍କ ବିୟୋଗରେ ଶୋକ ପ୍ରକାଶ କରିଛନ୍ତି । ପେରିଙ୍କ ମୃତ୍ୟୁ ଖବର ପାଇ ତାଙ୍କ ହୃଦୟ ଭାଙ୍ଗିଥିବା କହିଛନ୍ତି । ଏବଂ ଆଜି ଆମେ ଜଣେ ଉଜ୍ଜ୍ୱଳ ଅଭିନେତାଙ୍କୁ ହରାଇଲୁ ବୋଲି ସେ କହିଛନ୍ତି । ସେହିପରି ଅଭିନେତାଙ୍କ ବିୟୋଗରେ କେବଳ ଯେ ହଲିଉଡ ନୁହଁ ବରଂ ବଲିଉଡରେ ମଧ୍ୟ ଶୋକାକୁଳ ପରିବେଶ ସୃଷ୍ଟି ହୋଇଛି । ବଲିଉଡ ଅଭିନେତା ରଣଭୀର ସିଂ, ଅଭିନେତ୍ରୀ କରୀନା କପୁର, କିଆରା ଆଡଭାନୀ ଏବଂ ସାଉଥ ଅଭିନେତା ମହେଶ ବାବୁ, ଅଭିନେତ୍ରୀ ସାମନ୍ଥା ରୁଥ ପ୍ରଭୁ ଭଳି ଅନେକ ସେଲିବ୍ରିଟି ତାଙ୍କ ଫଟୋ ସେୟାର କରି ତାଙ୍କ ବିୟୋଗରେ ଦୁଃଖ ପ୍ରକାଶ କରିଛନ୍ତି ।