ହାଇଦ୍ରାବାଦ:ଦର୍ଶକଙ୍କ ମନ ଜିଣୁଛି ଡିସେମ୍ବର ୧ରେ ରିଲିଜ ହୋଇଥିବା ରଣବୀର କପୁର ଏବଂ ବବି ଦେଓଲ ଷ୍ଟାରର ଫିଲ୍ମ ଆନିମଲ । ଲୋକଙ୍କ ମଧ୍ୟରେ ଫିଲ୍ମକୁ ନେଇ ଭିନ୍ନ କ୍ରେଜ ଦେଖିବାକୁ ମିଳିଛି । ଥିଏଟରରେ ଜମୁଛି ପ୍ରବଳ ଭିଡ । ଏପରିକି ଫିଲ୍ମ ଗତ ୨ ଦିନ ମଧ୍ୟରେ ୧୦୦ କୋଟିରୁ ଅଧିକ ଆୟ କର ରେକର୍ଡ ସୃଷ୍ଟି କରିଛି । ତେବେ ଏହି ସଫଳତାକୁ ଦେଖି ବର୍ତ୍ତମାନ ଭାବବିହ୍ବଳ ହୋଇଛନ୍ତି ବବି ଦେଓଲ ।
ଆନିମଲରେ ଖଳନାୟକ ଭୂମିକାରେ ଅଭିନୟ କରିଥିବା ବବି ଦେଓଲ ତାଙ୍କ ଚରିତ୍ର ପାଇଁ ବେଶ ପ୍ରଶଂସା ସାଉଁଟୁଛନ୍ତି । ସେପଟେ ଏହା ଦେଖି ବବି ଦେଓଲ ବେଶ ଭାବବିହ୍ବଳ ହୋଇଛନ୍ତି । ଇନଷ୍ଟାଗ୍ରାମରେ ଜଣେ ପ୍ୟାପଙ୍କ ଦ୍ବାରା ସେୟାର ହୋଇଥିବା ଏକ ଭିଡିଓରେ ବବି ଦେଓଲ ନଜର ଆସିଛନ୍ତି । ପାପରାଜିଙ୍କ ଆଗରେ ଫିଲ୍ମର ସଫଳତା ପାଇଁ ସମସ୍ତ ଫ୍ୟାନ୍ସଙ୍କୁ ହାତଯୋଡି ଧନ୍ୟବାଦ ଜଣାଇଛନ୍ତି । ବବି ଦେଓଲ କହିଛନ୍ତି, 'ଏହି ଚଳଚ୍ଚିତ୍ରଟି ପାଇଥିବା ଅପାର ଭଲପାଇବା ମୋତେ ପ୍ରକୃତରେ ନମ୍ର କରିଛି । ମୋତେ ଏହା ଲାଗୁଛି, ମୁଁ ଏବେ ବି ସ୍ବପ୍ନ ଦେଖୁଛି ।' ଏଥିସହ ସେ କାରରେ ବସିବା ସମୟରେ ବେଶ ଭାବବିହ୍ବଳ ହୋଇ କାନ୍ଦୁଥିବାର ନଜର ଆସିଛନ୍ତି ।