ହାଇଦ୍ରାବାଦ:ସାଉଥ୍ରେ ଡେବ୍ୟୁ କରିବାକୁ ଯାଉଛନ୍ତି ବଲିଉଡ୍ ଅଭିନେତ୍ରୀ କଙ୍ଗନା ରାଣାୱତ । ଆଗାମୀ ଫିଲ୍ମ ଚନ୍ଦ୍ରମୁଖୀ-2ରେ ସାଉଥ ଅଭିନେତା ରାଘବ ଲରେନ୍ସଙ୍କ ସହ ନଜର ଆସିବେ ଅଭିନେତ୍ରୀ । ନିକଟରେ ଫିଲ୍ମରୁ କଙ୍ଗନା ଏବଂ ରାଘବଙ୍କ ପ୍ରଥମ ଲୁକ୍ ରିଲିଜ ହୋଇଥିଲା । ଯେଉଁଥିରେ କଙ୍ଗନାଙ୍କୁ ରାଣୀ ଲୁକ୍ରେ ଦେଖି ଫ୍ୟାନ୍ସ ଦିୱାନା ହୋଇଥିଲେ । ବର୍ତ୍ତମାନ ଫିଲ୍ମର ଟ୍ରେଲର ରିଲିଜ ହୋଇଛି ।
ଚେନ୍ନାଇରେ ଆୟୋଜିତ କାର୍ଯ୍ୟକ୍ରମରେ ଚନ୍ଦ୍ରମୁଖୀ-2ର ଟ୍ରେଲର ଲଞ୍ଚ୍ କରାଯାଇଛି । ଏଥିସହ ନିର୍ମାତା ନିଜ ଇନ୍ଷ୍ଟାଗ୍ରାମରେ ମଧ୍ୟ ଟ୍ରେଲର ରିଲିଜ କରିଛନ୍ତି । ଲାଇକା ପ୍ରଡକ୍ସନ ଇନଷ୍ଟାଗ୍ରାମ୍ରେ ଫିଲ୍ମର ଟ୍ରେଲର ରିଲିଜ କରି କ୍ୟାପସନରେ ଲେଖିଛନ୍ତି, ସମସ୍ତ ଅପେକ୍ଷାର ଅନ୍ତ ହୋଇଛି । ୟୁଟ୍ୟୁବରେ ବର୍ତ୍ତମାନ ଫିଲ୍ମର ଟ୍ରେଲର ରିଲିଜ ହୋଇଛି । ଏହାକୁ ଫ୍ୟାନ୍ସ ବେଶ ପସନ୍ଦ କରିଛନ୍ତି। ଟ୍ରେଲର ରିଲିଜ ହେବାର 1 ଘଣ୍ଟା ମଧ୍ୟରେ 5ଲକ୍ଷରୁ ଅଧିକ ଭ୍ୟୁ ମିଳିସାରିଲାଣି ।
ନିକଟରେ ଫିଲ୍ମର ପ୍ରଥମ ଗୀତ ସ୍ବାଗତାଞ୍ଚଳୀ ରିଲିଜ ହୋଇଥିଲା । କଙ୍ଗନା ଏହି ଗୀତରେ ଭାରତନାଟ୍ୟମ୍ କରୁଥିବାର ଦେଖିବାକୁ ମିଳିଛି । ଓସ୍କାର ବିଜେତା ସଂଗୀତ ରଚନା ଏମ.ଏମ କିରାଭାନୀଙ୍କ ଦ୍ୱାରା 'ସ୍ବାଗତାଞ୍ଜଳି' ଗୀତ ରଚନା କରାଯାଇଛି । ତେବେ ପି ବାସୁଙ୍କ ନିର୍ଦ୍ଦେଶିତ ତଥା ରଜନୀକାନ୍ତ ଏବଂ ଜ୍ୟୋତିକାଙ୍କ ଅଭିନୀତ ସଫଳ ତାମିଲ ହରର୍ କମେଡି ଚଳଚ୍ଚିତ୍ର ଚନ୍ଦ୍ରମୁଖୀର ସିକ୍ୱେଲ ହେଉଛି ଚନ୍ଦ୍ରମୁଖୀ-୨ । ପ୍ରଥମ ଭାଗ ପରି ଦ୍ବିତୀୟ ଭାଗକୁ ମଧ୍ୟ ପି ବାସୁ ନିର୍ଦ୍ଦେଶନା ଦେଇଛନ୍ତି । ଚନ୍ଦ୍ରମୁଖୀ-୨ ହେଉଛି କଙ୍ଗନାଙ୍କ ଅଭିନୀତ ଏକ ସ୍ୱତନ୍ତ୍ର ଚଳଚ୍ଚିତ୍ର । ଏହି ଚଳଚ୍ଚିତ୍ରରେ କଙ୍ଗନାଙ୍କ ସହ ତାମିଲ ଅଭିନେତା ରାଘଭ ଲରେନ୍ସ ନଜର ଆସିବେ । ଚଳିତ ବର୍ଷ ଗଣେଶ ଚତୁର୍ଥୀ ଅର୍ଥାତ୍ ସେପ୍ଟେମ୍ବର-19ରେ ଏହି ଚଳଚ୍ଚିତ୍ର ତାମିଲ, ତେଲୁଗୁ, ହିନ୍ଦୀ, ମାଲାୟାଲମ୍ ଏବଂ କନ୍ନଡ଼ରେ ସିନେମାହଲ୍ରେ ମୁକ୍ତିଲାଭ କରିବ ।
ଏହା ମଧ୍ୟ ପଢନ୍ତୁ:କଙ୍ଗନା ରାଣାୱତଙ୍କ ଫିଲ୍ମ 'ତେଜସ'କୁ ମିଳିଲା ରିଲିଜ ଡେଟ, ଏହି ଦିନ ରିଲିଜ
ଚନ୍ଦ୍ରମୁଖୀ-2 ବ୍ୟତୀତ କଙ୍ଗନା ତେଜସରେ ବାୟୁସେନା ପାଇଲଟ୍ ଭାବରେ ନଜର ଆସିବେ । ଏହି କାହାଣୀ ବାୟୁସେନା ପାଇଲଟ ତେଜସ ଗିଲ୍ଙ୍କ ଜୀବନ କାହାଣୀ ଉପରେ ଆଧାରିତ । ସର୍ବେସ ମେୱାରାଙ୍କ ଦ୍ୱାରା ଲିଖିତ ତଥା ନିର୍ଦ୍ଦେଶିତ ଏହି ଚଳଚ୍ଚିତ୍ରଟି ଅକ୍ଟୋବର 20ରେ ପ୍ରେକ୍ଷାଳୟରେ ରିଲିଜ ହେବ । ଏହା ବ୍ୟତୀତ କଙ୍ଗନାଙ୍କୁ ରାଜନୈତିକ ଡ୍ରାମା ଫିଲ୍ମ ଏମରଜେନ୍ସିରେ ବି ଦେଖିବାକୁ ମିଳିବ, ଯେଉଁଥିରେ ସେ ସ୍ୱର୍ଗତ ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଭୂମିକାରେ ଅଭିନୟ କରିବେ । ଏହି ଚଳଚ୍ଚିତ୍ରରେ ଅନୁପମ ଖେର, ମହିମା ଚୌଧୁରୀ, ବିଶାକ୍ ନାୟର ଏବଂ ଶ୍ରେୟସ୍ ତଲପଡେ ମଧ୍ୟ ଗୁରୁତ୍ବପୂର୍ଣ୍ଣ ଭୂମିକାରେ ନଜର ଆସିବେ ।
