ହାଇଦ୍ରାବାଦ: ଦୀର୍ଘ ଦିନର ଅପେକ୍ଷା ପରେ ଶେଷରେ ଅଯୋଧ୍ୟାରେ ଶ୍ରୀରାମଙ୍କ ମନ୍ଦିର ଉଦଘାଟନ ହେବ । ଏଥିପାଇଁ ଜାନୁଆରୀ ୧୬ରୁ ଏହାର ରୀତିନୀତି ଆରମ୍ଭ ହୋଇଛି । ଏହି ଐତିହାସିକ ସମାରୋହ ପାଇଁ ଦେଶବାସୀ ଚାହିଁ ରହିଥିବା ବେଳେ ଏଥିରେ ରାଜନେତାଙ୍କ ଠାରୁ ଆରମ୍ଭ କରି ସେଲିବ୍ରିଟି ଏବଂ ବହୁ ମାନ୍ୟଗଣ୍ୟ ବ୍ୟକ୍ତି ସାମିଲ ହେବେ । ଏହାରି ମଧ୍ୟରେ ବର୍ତ୍ତମାନ ଅନୁପମ ଖେର ଏହି ସମାରୋହରେ ସାମିଲ ହେବା ନେଇ ଏକ ଭିଡିଓ ସେୟାର କରି ଖୁସିବ୍ୟକ୍ତ କରିଛନ୍ତି । ସୋସିଆଲ ମିଡିଆରେ ଏକ ଭିଡିଓ ସେୟାର କରି ରାମଲାଲାଙ୍କ ଏହି ବିଶେଷ ଉତ୍ସବରେ ସାମିଲ ହେବା ନେଇ ନିଜକୁ ଭାଗ୍ୟବାନ ବୋଲି କହିଛନ୍ତି ।
ଅନୁପମ ଖେର ନିଜ ଇନଷ୍ଟାଗ୍ରାମରେ ଏକ ଭିଡିଓ ସେୟାର କରିଛନ୍ତି । ସେ କହିଛନ୍ତି, 'ମୁଁ ଜାନୁଆରୀ ୨୨ରେ ଅଯୋଧ୍ୟାରେ ସାମିଲ ହୋଇ ମୋର ପୂର୍ବଜ ଏବଂ ବିଶେଷକରି ନିଜ ଜେଜେବାପା ପଣ୍ଡିତ ଅମରନାଥଙ୍କୁ ପ୍ରତିନିଧିତ୍ବ କରିବି । ଯେଉଁମାନେ ରାମ ମନ୍ଦିର ସ୍ଥାପନର ସ୍ବପ୍ନ ଦେଖୁଥିଲେ । ଏଥିସହ ଏହି ସମୟରେ ସମସ୍ତ କାଶ୍ମିରୀ ହିନ୍ଦୁ ଭାଇ ଭଉଣୀ ଆତ୍ମୀୟ ରୂପରେ ମୋ ସହ ସାମିଲ ହେବେ । ମୁଁ ଆପଣ ସମସ୍ତଙ୍କ ପାଇଁ ପ୍ରାର୍ଥନା କରିବି । ମୁଁ ପ୍ରଭୁ ଶ୍ରୀ ରାମଙ୍କ ଆଶୀର୍ବାଦରେ ଏହି ଐତିହାସିକ ସମାରୋହରେ ସାମିଲ ହେଉଥିବାରୁ ନିଜକୁ ଭାଗ୍ୟବାନ ମନେ କରୁଛି । ଜୟ ଶ୍ରୀ ରାମ ।'