ମୁମ୍ବାଇ:ବଲିଉଡ ଲୋକପ୍ରିୟ ଅଭିନେତା ହ୍ରିତିକ ରୋଶନ ତାଙ୍କ ପ୍ରଶଂସକଙ୍କୁ ଦମଦାର ଆକ୍ସନ ଫିଲ୍ମ ଭେଟି ଦେବାକୁ ଯାଉଛନ୍ତି । ହ୍ରିତିକ୍ ଆଜିକାଲି ଫିଲ୍ମ ଠାରୁ ଅଧିକ ନିଜ ଲଭ ଲାଇଫକୁ ନେଇ ଚର୍ଚ୍ଚାରେ ରହୁଛନ୍ତି । ଏହାରି ମଧ୍ୟରେ ସେ ତାଙ୍କର ଆଗାମୀ ଏରିୟଲ୍ ଆକ୍ସନ୍ ଫିଲ୍ମ 'ଫାଇଟର୍'ରୁ ପ୍ରଥମ ଲୁକ ରିଲିଜ କରିଛନ୍ତି । ସୋସିଆଲ ମିଡିଆରେ ଫିଲ୍ମର ପ୍ରଥମ ଲୁକ ସେୟାର କରିଛନ୍ତି ହ୍ରିତିକ । ପୋଷ୍ଟର ସେୟାର କରି ଫିଲ୍ମ ରିଲିଜ୍ ପାଇଁ କେତେ ସମୟ ବାକି ଅଛି ତାହା ମଧ୍ୟ କହିଛନ୍ତି ।
ହ୍ରିତିକ ନିଜ ଇନଷ୍ଟାଗ୍ରାମରେ ଫିଲ୍ମର ପ୍ରଥମ ଲୁକ ସେୟାର କରିଛନ୍ତି । ପୋଷ୍ଟରରେ ହ୍ରିତିକ ରୋଶନ ଆକ୍ସନ ଲୁକରେ ନଜର ଆସିଛନ୍ତି । ଏହି ପୋଷ୍ଟର ସେୟାର କରି ଅଭିନେତା ଲେଖିଛନ୍ତି, 'ଫାଇଟର' ଆସନ୍ତା ବର୍ଷ ଜାନୁୟାରୀ 25ରେ ରିଲିଜ ହେବ । ଏହାର ରିଲିଜ ପାଇଁ ଆଉ ମାତ୍ର 7 ମାସ ବାକି ଅଛି । ହ୍ରିତିକଙ୍କ ଏହି ପୋଷ୍ଟର ସେୟାର ହେବା ମାତ୍ରେ ଫ୍ୟାନ୍ସ ସମେତ ଅନେକ ସେଲିବ୍ରିଟି ଏହାକୁ ଲାଇକ କରିବା ସହ ପ୍ରତିକ୍ରିୟା ଦେଇଛନ୍ତି । ବଲିଉଡ ଅଭିନେତା ଅନିଲ କପୁର, ଚଳଚ୍ଚିତ୍ର ନିର୍ମାତା ଜୋୟା ଅଖତର ଏବଂ ଅଭିନେତାଙ୍କ ଭଉଣୀ ପାଶ୍ମିନା ରୋଶନ ମଧ୍ୟ ପ୍ରତିକ୍ରିୟା ଦେଇଛନ୍ତି ।
ସୂଚନା ଥାଉକି, 1000 କୋଟିରୁ ଅଧିକ ରୋଜଗାର କରିଥିବା ଶାହାରୁଖ ଖାନଙ୍କ ଅଭିନୀତ ଚଳଚ୍ଚିତ୍ର 'ପଠାନ'ର ନିର୍ଦ୍ଦେଶକ ସିଦ୍ଧାର୍ଥ ଆନନ୍ଦ ଏହି ଚଳଚ୍ଚିତ୍ର ନିର୍ମାଣ କରୁଛନ୍ତି । ଚଳଚ୍ଚିତ୍ର ଉପରେ ଦୀର୍ଘ ସମୟ ଧରି କାମ ଚାଲିଛି । ଏହା ହେଉଛି ଭାରତୀୟ ସିନେମାର ପ୍ରଥମ ଏରିୟଲ୍ ଆକ୍ସନ୍ ଫିଲ୍ମ, ଯେଉଁଥିରେ ହ୍ରିତିକ୍ ରୋଶନ ଜଣେ ଫାଇଟର ଭୂମିକାରେ ଅଭିନୟ କରିବାକୁ ଯାଉଛନ୍ତି । ଫିଲ୍ମରେ ହ୍ରିତିକଙ୍କ ବିପକ୍ଷରେ ଅଭିନେତ୍ରୀ ଦୀପିକା ପାଦୁକୋନଙ୍କୁ ଦେଖିବାକୁ ମିଳିବ ।
ସେପଟେ ହ୍ରିତିକ 'ୱାର 2' ରେ ମଧ୍ୟ ନଜର ଆସିବେ । ୟଶରାଜ ସ୍ପାଏ ୟୁନିଭର୍ସ ଫିଲ୍ମ 'ପଠାନ'ରୁ 1000 କୋଟିରୁ ଅଧିକ ସଂଗ୍ରହ କରିବା ପରେ ବର୍ତ୍ତମାନ ଫିଲ୍ମ'ୱାର-୨ 'ପାଇଁ ପ୍ରସ୍ତୁତ ହେଉଛି । ଏହି ଫିଲ୍ମରେ ଏକାଠି ନଜର ଆସିବେ ବଲିଉଡ ସୁପରଷ୍ଟାର ହ୍ରିତିକ ରୋଶନଙ୍କ ସହ ସାଉଥ ଫିଲ୍ମ ଇଣ୍ଡଷ୍ଟ୍ରିର ଷ୍ଟାର ଜୁନିଅର ଏନଟିଆର । ହ୍ରିତିକ ଏବଂ ଜୁନିଅର ଏନଟିଆରଙ୍କ ବ୍ୟତୀତ ଅନେକ ବଲିଉଡ ତାରକା ନଜର ଆସିବେ ବୋଲି କୁହାଯାଉଛି । ସଲମାନ ଖାନ, ଶାହାରୁଖ ଖାନ, କ୍ୟାଟ୍ରିନା କୈଫ, ଟାଇଗର ଶ୍ରଫ, ଦୀପିକା ପାଦୁକୋନ, ଜନ୍ ଅବ୍ରହାମ ଏବଂ ଇମ୍ରାନ ହାଶମୀ ମଧ୍ୟ ଫିଲ୍ମରେ ନଜର ଆସିବା ନେଇ ଆଲୋଚନା ହେଉଛି । ୟଶରାଜ ବ୍ୟାନରର ସ୍ପାଏ ୟୁନିଭର୍ସର ଏହି ଫିଲ୍ମ ଖୁବଶୀଘ୍ର ରିଲିଜ ହେବାକୁ ଯାଉଛି । ଏହି ଫିଲ୍ମଟି 2025 ମସିହା ଜାନୁଆରୀ 24ରେ ସିନେମା ହଲରେ ରିଲିଜ ହେବ ।
