ହାଇଦ୍ରାବାଦ: ହରିୟାଣାର ନୁହରେ ଆରମ୍ଭ ହୋଇଥିବା ସାମ୍ପ୍ରଦାୟିକ ହିଂସା ନିଆଁ ଏବେ ଗୁରୁଗ୍ରାମରେ ତେଜିବାରେ ଲାଗିଛି । ମଙ୍ଗଳବାର ଗୁରୁଗ୍ରାମର ଏକ ମସଜିଦରେ କିଛି ଉପଦ୍ରବୀ ଆକ୍ରମଣ କରିଥିଲେ । ଫଳରେ ଏଥିରେ 6 ଜଣଙ୍କ ମୃତ୍ୟୁ ହୋଇଛି । କେବଳ ଏତିକି ନୁହେଁ ଅନେକ ଦୋକାନ ଏବଂ ରେସ୍ତୋରାଁରେ ମଧ୍ୟ ନିଆଁ ଲଗାଇ ଦେଇଥିଲେ । ଏହି ହିଂସା ଉପରେ ବର୍ତ୍ତମାନ ବଲିଉଡର ସେଲିବ୍ରିଟିମାନେ ମଧ୍ୟ ରାଗିଯାଇଛନ୍ତି । ସୋସିଆଲ ମିଡିଆରେ ପୋଷ୍ଟ କରି ଘଟଣାକୁ ନେଇ ବର୍ଷିଛନ୍ତି । ଅଭିନେତା ଧର୍ମେନ୍ଦ୍ର ଏବଂ ସୋନୁ ସୁଦ ସୋସିଆଲ ମିଡିଆରେ ପ୍ରତିକ୍ରିୟା ରଖିବା ସହ ଏହି ଦଙ୍ଗାରେ ପ୍ରଭାବିତ ହେଉଥିବା ଲୋକଙ୍କ ପାଇଁ ପ୍ରାର୍ଥନା କରିଛନ୍ତି ।
ଟ୍ବିଟରରେ ବଲିଉଡ ବର୍ଷିୟାନ ଅଭିନେତା ଧର୍ମେନ୍ଦ୍ର ହାଟ ଯୋଡିଥିବା ଫଟୋ ସେୟାର କରି ଲେଖିଛନ୍ତି, ଏହି ହଇଚଇ... କାହିଁକି ... କଣ ପାଇଁ ? କ୍ଷମା କର ମାଲିକ, ବର୍ତ୍ତମାନ ତ କ୍ଷମା କର । ଏହାକୁ ଆଉ ସହ୍ୟ କରିହେଉନାହିଁ । ଏହାସହିତ ସେ ହାତ ଯୋଡିଥିବା ଏକ ଇମୋଜି ସେୟାର କରିଛନ୍ତି । ଧର୍ମେନ୍ଦ୍ରଙ୍କ ପୋଷ୍ଟରେ ଏକ ଶିଶୁ କନ୍ୟାର ଫଟୋ ସେୟାର କରି ଜଣେ ପ୍ରଶଂସକ ଲେଖିଛନ୍ତି, କାମାକ୍ଷା ଆପଣଙ୍କର ସମସ୍ତ ଯନ୍ତ୍ରଣା ଦୂର କରନ୍ତୁ ଏବଂ ଆପଣଙ୍କୁ ଭଲ ସ୍ୱାସ୍ଥ୍ୟ ଏବଂ ସୁଖ ଦିଅନ୍ତୁ । ସେହିପରି ଅଭିନେତା ସୋନୁ ସୁଦ ଲେଖିଛନ୍ତି, ନା କାହାର ଘର ଜଳିଛି, ନା କାହାର ଦୋକାନ, କେବଳ ଜଳୁଥିଲା ମାନବିକତା, ମଣିଷ ଦେଖୁଥିଲା । ସୋନୁ ସୁଦଙ୍କ ଏହି ଟ୍ୱିଟ ଏବେ ଭାଇରାଲ ହେବାରେ ଲାଗିଛି ।