ହାଇଦ୍ରାବାଦ: ଶାହରୁଖ ଖାନଙ୍କ ନୂଆ ଚଳଚ୍ଚିତ୍ର ‘ଜବାନ’ ବକ୍ସ ଅଫିସରେ ଧମାଲ ମଚାଉଛି । ଅଟଲିଙ୍କ ନିର୍ଦ୍ଦେଶିତ ଏହି ଚଳଚ୍ଚିତ୍ରଟି କେବଳ ପ୍ରଥମ ଦିନରେ ଜବରଦସ୍ତ କଲେକ୍ସନ କରିନାହିଁ, ବରଂ ରବିବାର ଦିନ ଗୋଟିଏ ଦିନରେ ସର୍ବାଧିକ କଲେକ୍ସନ କରି ରେକର୍ଡ ଭାଙ୍ଗିଛି । ଏହି ଚଳଚ୍ଚିତ୍ରରେ ନୟନତାରା, ବିଜୟ ସେଥୁପତି ଏବଂ ଦୀପିକା ପାଦୁକୋନ ମୁଖ୍ୟ ଭୂମିକାରେ ଅଭିନୟ କରିଛନ୍ତି ।
ଫିଲ୍ମର କ୍ରେଜ୍ ବର୍ତ୍ତମାନ କେବଳ ପ୍ରଶଂସକଙ୍କ ପାଇଁ ନୁହେଁ ବରଂ ଫିଲ୍ମ ଷ୍ଟାର୍ଙ୍କ ପାଖରେ ମଧ୍ୟ ଦେଖିବାକୁ ମିଳିଛି । ସୋମବାର ସନ୍ଧ୍ୟାରେ ଅକ୍ଷୟ କୁମାର ଫିଲ୍ମ ‘ଜବାନ’ର ପ୍ରଶଂସା କରିଥିବାବେଳେ ରାତିରେ ଅଭିନେତା ଅନୁପମ ଖେର ମଧ୍ୟ ଫିଲ୍ମ ବିଷୟରେ ଏକ ପୋଷ୍ଟ ସେୟାର କରିଛନ୍ତି ।
ଜବାନକୁ ନେଇ ଅନୁପମ ଖେର୍ଙ୍କ ପୋଷ୍ଟ
ଅନୁପମ ଖେର ମଧ୍ୟ ଶାହରୁଖ ଖାନଙ୍କୁ ଧନ୍ୟବାଦ ଦେବା ପାଇଁ ତାରକାଙ୍କ ଟିମ୍ରେ ସାମିଲ ହୋଇଛନ୍ତି । ଫିଲ୍ମ ଦେଖିବା ପରେ ଅନୁପମ ଖେର ଏକ ପୋଷ୍ଟ ସେୟାର କରିଛନ୍ତି, ଯେଉଁଥିରେ ଲେଖିଛନ୍ତି- 'ପ୍ରିୟ ଶାହାରୁଖ ! ଏବେ ଏବେ ଅମୃତସରରୁ ଅଡିସନ୍ ଦେଇ ତୁମର ଚଳଚ୍ଚିତ୍ର ‘ଜବାନ’ ଦେଖି ଫେରୁଛି । ମଜା ଆସିଗଲା । ଆକ୍ସନ, ପିକ୍ଚରର ସ୍କେଲ୍, ତୁମର ଅନ୍ଦାଜ ଏବଂ ପରଫମାନ୍ସ ବହୁତ ଭଲ ହୋଇଛି । ଗୋଟିଏ କିମ୍ବା ଦୁଇଟି ସ୍ଥାନରେ ତ ମୁଁ ସିଟି ମାରିଦେଲି ! ସମସ୍ତେ ଏହି ଫିଲ୍ମକୁ ପସନ୍ଦ କରିଥିଲେ। ସମଗ୍ର ଟିମ୍ ଏବଂ ଲେଖକ, ନିର୍ଦ୍ଦେଶକଙ୍କୁ ଅଭିନନ୍ଦନ । ମୁମ୍ବାଇକୁ ଫେରିବା ପରେ ମୁଁ ନିଶ୍ଚିତ ଭାବରେ ତୁମକୁ ହଗ୍ କରିବି ଏବଂ କହିବି- ଓ ପୋଚି, ଓ କୋକି, ଓ ପୋପି, ଓ ଲୋଲା ।
ଅକ୍ଷୟ କୁମାର ମଧ୍ୟ ଅଭିନନ୍ଦନ ଜଣାଇଛନ୍ତି
ଅକ୍ଷୟ କୁମାର ତାଙ୍କ ଏକ୍ସ (ପୂର୍ବରୁ ଟ୍ୱିଟର) ଆକାଉଣ୍ଟରେ ଶାହାରୁଖ ଖାନଙ୍କୁ ଜବାନର ବ୍ଲକବଷ୍ଟର ସଫଳତା ପାଇଁ ଅଭିନନ୍ଦନ ଜଣାଇଛନ୍ତି। ଅକ୍ଷୟ ଲେଖିଛନ୍ତି, ‘‘ବଡ଼ ସଫଳତା !! ମୋର ଜବାନ ପଠାନ @iamsrk (କ୍ଲାପ୍ ଇମୋଜି) ଆମର ଚଳଚ୍ଚିତ୍ର ଫେରି ଆସିଛି ।’’