ଗୁରୁବାର ରୋଡ ଶୋ, ଶୁକ୍ରବାର ଭରିବେ ନାମାଙ୍କନ

ଗୁରୁବାର ବାରଣାସୀରେ ମୋଦିଙ୍କ ମେଗା ରୋଡ ଶୋ । ଶୁକ୍ରବାର ସଂସଦୀୟ କ୍ଷେତ୍ରରୁ ଭରିବେ ନାମାଙ୍କନ । ଉପସ୍ଥିତ ରହିବେ ଦଳୀୟ କର୍ମକର୍ତ୍ତା, ନେତା ,ଏନଡିଏର ପ୍ରମୁଖ ନେତା,ମନ୍ତ୍ରୀ, ମୁଖ୍ୟମନ୍ତ୍ରୀଙ୍କ ସମେତ ପୂର୍ବମୁଖ୍ୟମନ୍ତ୍ରୀ।

ଲକ୍ଷ୍ନୌ: ଦୁଇ ଦିନିଆ ବାରଣାସୀ ଗସ୍ତରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଗୁରୁବାର କାଶୀରେ ମେଗା ରୋଡ ଶୋ କରିବା ସହ ଶୁକ୍ରବାର ନାମାଙ୍କନ ଦାଖଲ କରିବାର କାର୍ଯ୍ୟକ୍ରମ ରହିଛି । ତେବେ ମୋଦିଙ୍କୁ ସ୍ବାଗତ କରିବା ନେଇ ସମ୍ପୂର୍ଣ୍ଣ ବାରଣାସୀକୁ ପୁରା ଦୁଲହନ ଭଳି ସଜାଯାଇଛି ।

ତେବେ ପ୍ରଥମେ ଏହି ରୋଡ ଶୋ ହିନ୍ଦୁ ବିଶ୍ବବିଦ୍ୟାଳୟର ସଂସ୍ଥାପକ ମଦନ ମୋହନ ମାଲବୀୟଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରିବା ପରେ ହିଁ ଆରମ୍ଭ ହେବ। ପରେ ଅପରାହ୍ନ 3ଟାରେ ଆରମ୍ଭ ହେବ ରୋଡ ଶୋ । ଏହି ଶୋ ବାରଣାସୀର ପ୍ରସିଦ୍ଧ ଦଶାଶ୍ବମେଧ ଘାଟରେ ସମାପ୍ତ ହେବ । ଏହାପରେ ସନ୍ଧ୍ୟା 7ଟା ସମୟରେ ଗଙ୍ଗା ଆଳତୀରେ ଭାଗ ନେବେ ମୋଦି।

ତେବେ 2014 ମସିହାର ରୋଡ ଶୋ ଠାରୁ ଚଳିତବର୍ଷ ରୋଡ ଶୋ ସବୁଠାରୁ ବିଶାଳକାୟ ହେବ ବୋଲି ଦଳର ଜଣେ ଅଧିକାରୀ ସୂଚନା ଦେଇଛନ୍ତି । ଏନେଇ କିଛି ଦିନ ହେବ ଜୋରସୋରରେ ଆୟୋଜନ ଚାଲିଛି । ତେବେ 26 ଏପ୍ରିଲ ଶୁକ୍ରବାର ବିଜେପି କାର୍ଯ୍ୟକର୍ତ୍ତାଙ୍କ ସହିତ ଏକ ବୈଠକରେ ଯୋଗଦେବେ । ଏହାପରେ କାଳ ଭୈରବ ମନ୍ଦିରରେ ଦର୍ଶନ କରିସାରିବା ପରେ ବାରଣାସୀ ସଂସଦୀୟ କ୍ଷେତ୍ରରେ ନାମାଙ୍କନ ଦାଖଲ କରିବେ ମୋଦି। ଏହି ସମୟରେ ଦଳୀୟ କର୍ମକର୍ତ୍ତା, ନେତା ,ଏନଡିଏର ପ୍ରମୁଖ ନେତା,ମନ୍ତ୍ରୀ, ମୁଖ୍ୟମନ୍ତ୍ରୀଙ୍କ ସମେତ ପୂର୍ବମୁଖ୍ୟମନ୍ତ୍ରୀ ଉପସ୍ଥିତ ରହିବେ ।