ନାମାଙ୍କନ ପୂର୍ବରୁ ଦଳୀୟ କାର୍ଯ୍ୟକର୍ତ୍ତାଙ୍କୁ ଗୁରୁମନ୍ତ୍ର ଦେଲେ ମୋଦି

ନାମାଙ୍କନ ଭରିବା ପୂର୍ବରୁ ହୋଟେଲ ଡି ପ୍ୟାଲେସରେ ଦଳୀୟ କାର୍ଯ୍ୟକର୍ତ୍ତାଙ୍କୁ ସମ୍ବୋଧିତ କରିଛନ୍ତି ମୋଦି।

ଲକ୍ଷ୍ନୌ: ବାରାଣାସୀର ରଣକ୍ଷେତ୍ରରେ ପୁଣିଥରେ ବିଜୟ ହାସଲ କରିବା ପାଇଁ ଆଜି ନାମାଙ୍କନ ପତ୍ର ଦାଖଲ କରିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଏହି ଅବସରରେ ଉପସ୍ଥିତ ରହିବେ ଅନେକ ସହଯୋଗୀ ଦଳର ମୁଖିଆ ଏବଂ ନେତା । ମୋଦି ପୂର୍ବାହ୍ନ 11 ଟା 30 ମିନିଟ ସମୟରେ ସେ ନିଜ ନାମାଙ୍କନ ପତ୍ର ଦାଖଲ କରିବେ । ତେବେ ନାମାଙ୍କନ ଭରିବା ପୂର୍ବରୁ ହୋଟେଲ ଡି ପ୍ୟାଲେସ ରେ ନିଜ ଦଳୀୟ କାର୍ଯ୍ୟକର୍ତ୍ତାଙ୍କୁ ସମ୍ବୋଧିତ କରିଛନ୍ତି ମୋଦି ।

ନିଜ କାର୍ଯ୍ୟକର୍ତ୍ତାଙ୍କୁ ସମ୍ବୋଧିତ କରି ସେ କହିଛନ୍ତି, କାଲିର ଦୃଶ୍ୟରେ ମୁଁ ଆପଣଙ୍କ ଝାଳର ମହକ ଅନୁଭବ କରିପାରୁଥିଲି । ମୁଁ ମଧ୍ୟ ଦିନେ ବୁଥ କାର୍ଯ୍ୟକର୍ତ୍ତା ଥିଲି । ମତେ ବି ଦିନେ କାନ୍ଥରେ ପୋଷ୍ଟର ଲଗାଇବାର ସୌଭାଗ୍ୟ ଅର୍ଜନ କରିଥିଲି । ଆଜି ଏହି ମଞ୍ଚରେ ମୁଁ ଆପଣ ସମସ୍ତଙ୍କୁ ଏବଂ ଦେଶର ସମସ୍ତ ନାଗରିକଙ୍କୁ ଧନ୍ୟବାଦ ଜଣାଉଛି । ଏହା ପୂର୍ବରୁ ମୋଦି ପୂର୍ବ-ଉତ୍ତର ଏବଂ ଦକ୍ଷିଣ ଭାରତର ଏନଡିଏ ନେତାଙ୍କ ସହ ଏକ ବୈଠକ କରିଥିଲେ।