ଭୁବନେଶ୍ବର: ଛତିଶଗଡର ରାଜଧାନୀ ରାୟପୁରରେ ଏକ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଥିଲା । ସ୍ବାମୀ ବିବେକାନନ୍ଦ ବିମାନବନ୍ଦରରେ ହୋଇଥିବା ହେଲିକପ୍ଟର ଦୁର୍ଘଟଣାଗ୍ରସ୍ତ ଦୁଇ ପାଇଲଟଙ୍କ ମୃତ୍ୟୁ ଘଟିଥିଲା । ଦୁଇଜଣଙ୍କ ମଧ୍ୟରୁ ଜଣେ ଓଡିଆ ହୋଇଥିବା ସୂଚନା ମିଳିଛି । ମୃତ ପାଇଲଟ ହେଲେ ସମ୍ବଲପୁର ଜି୍ଲ୍ଲା ଯୁଜୁମୁରା ବ୍ଲକ ବାହାମ ଗାଁର ଗୋପାଳକୃଷ୍ଣ ପଣ୍ଡା । ଏ ଖବର ମିଳିବା ପରେ ପରିବାରରେ ଶୋକର ଛାୟା ଖେଳିଯାଇଛି ।
2010ରୁ ଦୀର୍ଘ 12 ବର୍ଷ ହେବେ ସେ ପାଇଲଟ ଭାବରେ ରାୟପୁରରେ କାର୍ଯ୍ୟ କରି ଆସୁଛନ୍ତି । ତାଙ୍କ ପରିବାର ସହ ରାୟପୁରରେ ରହି ଆସୁଥିଲେ । ତାଙ୍କ ସାନ ଭାଇଙ୍କ ପରିବାର ସମ୍ବଲପୁର ସହର ହୀରାକୁଦ କଲୋନୀରେ ରୁହନ୍ତି । ଗୋପାଳ ଜଣେ ଭଲ ମିଷ୍ଟଭାଷୀ ସ୍ବାଭାବର ବ୍ୟକ୍ତି ଥିଲେ । ତାଙ୍କ ଅକାଳ ବିୟୋଗ ଖବର ପରିବାର ପାଖରେ ଖବର ପହଞ୍ଚିବା ପରେ କାନ୍ଦ ବୋବାଳି ପଡ଼ି ଯାଇଥିଲା । ରାତିରେ ହିଁ ପରିବାର ଲୋକେ ରାୟପୁର ଅଭିମୁଖେ ବାହାରି ଯାଇଛନ୍ତି । ଆଜି ପରିବାର ଲୋକଙ୍କୁ ମୃତଦେହକୁ ହସ୍ତାନ୍ତର କରାଯିବ । ଶେଷକୃତ ସମ୍ପର୍କରେ କୌଣସି ସୂଚନା ମିଳି ପାରିନାହିଁ ।