ସମ୍ବଲପୁର: ଜିଲ୍ଲାରେ ଆଜି ନିର୍ମାଣ ଶ୍ରମିକଙ୍କ ଅସନ୍ତୋଷ ପ୍ରକାଶ ପାଇଛି । ସରକାରୀ ସୁବିଧାରୁ ଏମାନଙ୍କୁ ବଞ୍ଚିତ ରଖାଯାଉଥିବାର ଅଭିଯୋଗ ହୋଇଛି । ବାରମ୍ବାର ଜିଲ୍ଲା ଶ୍ରମ କାର୍ଯ୍ୟାଳୟକୁ ଗଲେ ମଧ୍ୟ କୌଣସି ଲାଭ ହେଉନଥିବାର ଅଭିଯୋଗ କରିଛି ଜିଲ୍ଲା ନିର୍ମାଣ ଶ୍ରମିକ ସମନ୍ବୟ ସମିତି । ଏନେଇ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରିବା ସହ ରାସ୍ତାରୋକ କରିଥିଲେ ।
ସମ୍ବଲପୁରରେ ନିର୍ମାଣ ଶ୍ରମିକଙ୍କ ଆନ୍ଦୋଳନ ଆବେଦନକାରୀ ଶ୍ରମିକ ହିତାଧିକାରୀଙ୍କୁ ପରିଚୟ ପତ୍ର ଦେବାରେ ବିଳମ୍ବ, ଦୀର୍ଘ ବର୍ଷ ଧରି ଯନ୍ତ୍ରପାତି ଓ ସାଇକେଲ ନଦେବା ସହ ମୃତ୍ୟୁକାଳିନୀ ସହାୟତା, ବିବାହ, ଶିକ୍ଷା ଓ ପ୍ରସବକାଳୀନ ସହାୟତା ଦେବାରେ ଜିଲ୍ଲା ଶ୍ରମ କାର୍ଯ୍ୟାଳୟ ଅବହେଳା କରୁଥିବାର ଅଭିଯୋଗ ହୋଇଛି ।
ଜିଲ୍ଲାପାଳଙ୍କ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହ ଜିଲ୍ଲାପାଳଙ୍କ ନିକଟରେ ଏକ ଲିଖିତ ଅଭିଯୋଗ ମଧ୍ୟ କରିଥିଲେ । ଏହା ପରେ ଜିଲ୍ଲା ଶ୍ରମ ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ପ୍ରତିବାଦ ଜଣାଇ ରାସ୍ତାରୋକ କରିଥିଲେ ନିର୍ମାଣ ଶ୍ରମିକ । ପରବର୍ତ୍ତୀ ସମୟରେ ଡେପୁଟି ଶ୍ରମିକ କମିଶନରଙ୍କ ସହ ଆଲୋଚନା କରିବା ସହ ପ୍ରତିଶ୍ରୃତି ପାଇବା ପରେ ଆନ୍ଦୋଳନରୁ ଓହରିଥିଲେ ।
ସମ୍ବଲପୁରରୁ ବାଦଶାହ ଜୁଷ୍ମନ ରଣା, ଇଟିଭି ଭାରତ
