ବୁର୍ଲା ମେଡିକାଲରେ ରୋଗୀ ସମ୍ପର୍କୀୟଙ୍କୁ ମାଡ ଘଟଣା: ଦୁର୍ଭାଗ୍ୟଜନକ କହିଲେ ମନ୍ତ୍ରୀ

ବୁର୍ଲା ମେଡିକାଲ ପରିସରରେ ଥିବା ଫାଣ୍ଡି ସମ୍ମୁଖରେ ରୋଗୀଙ୍କ ସମ୍ପର୍କୀୟଙ୍କୁ ଡାକ୍ତରୀ ଛାତ୍ରଙ୍କ ମାଡମରା ଘଟଣା । ତଦନ୍ତ ଜାରି ଥିବା କହିଲେ ସମ୍ବଲପୁର ଏସପି । ସେପଟେ ଘଟଣାକୁ ଦୁର୍ଭାଗ୍ୟଜନକ କହିଛନ୍ତି ସ୍ଵାସ୍ଥ୍ୟମନ୍ତ୍ରୀ ।

ସମ୍ବଲପୁର: ବୁର୍ଲା ମେଡିକାଲ ପରିସରରେ ଥିବା ଫାଣ୍ଡି ସମ୍ମୁଖରେ ରୋଗୀଙ୍କ ସମ୍ପର୍କୀୟଙ୍କୁ ଡାକ୍ତରୀ ଛାତ୍ରଙ୍କ ମାଡମରା ଭିଡିଓ ଭାଇରାଲ ଘଟଣା । ଭିଡିଓ ଭାଇରାଲକୁ 24 ଘଣ୍ଟାରୁ ଅଧିକ ସମୟ ପରେ ବି ପୋଲିସ ହାତ ଖାଲି । ସେପଟେ ଘଟଣାର ତଦନ୍ତ ହେଉଥିବା ଏସପି କହୁଥିବାବେଳେ ଘଟଣାକୁ ଦୁର୍ଭାଗ୍ୟଜନକ କହିଛନ୍ତି ସ୍ଵାସ୍ଥ୍ୟମନ୍ତ୍ରୀ । ଅନ୍ୟପଟେ ଘଟଣାକୁ ନେଇ ଆଜି(ମଙ୍ଗଳବାର) ଉତ୍ତରାଞ୍ଚଳ ଡିଆଇଜି ସମୀକ୍ଷା ବୈଠକ କରିଛନ୍ତି ।

ତେବେ ଘଟଣାକୁ ନେଇ ସମ୍ବଲପୁର ଏସପି କହିଛନ୍ତି ଯେ, ‘ଘଟଣା ସମ୍ପର୍କିତ ସିସିଟିଭିର ଫୁଟେଜ ଓ କାଗଜପତ୍ର ଯାଞ୍ଚ ଚାଲିଛି । ଭାଇରାଲ ଭିଡିଓର ଯାଞ୍ଚ ହେବା ସହ ନିରପେକ୍ଷ ତଦନ୍ତ ଜାରି ରହିଛି ।’ ସେପଟେ ଡାକ୍ତରୀ ଛାତ୍ରଙ୍କ ମାଡର ଶିକାର ହୋଇ ଓଲଟା ଗିରଫ ହୋଇଥିବା ତାଲବ ଗାଁର ପୀଡିତ ଯୁବକ ସତ୍ୟନାରାୟଣ ପ୍ରଧାନ ଆଜି ସମ୍ବଲପୁର ଏସପିଙ୍କୁ ଭେଟି ଅଭିଯୋଗ କରିଛନ୍ତି ।

ଅନ୍ୟପକ୍ଷରେ ସ୍ବାସ୍ଥ୍ୟ ବିଭାଗର ଏକ ଟିମ୍‌ ତଦନ୍ତ କରୁଛି । ମେଡିକାଲକୁ ସ୍ବାସ୍ଥ୍ୟ ବିଭାଗର ଅତିରିକ୍ତ ସଚିବ ଯାଇଛନ୍ତି । ରିପୋର୍ଟ ଆସିଲା ପରେ ଦୃଢ କାର୍ଯ୍ୟାନୁଷ୍ଠାନ ନିଆଯିବ ବୋଲି ସ୍ଵାସ୍ଥ୍ୟମନ୍ତ୍ରୀ ନବ ଦାସ ସୂଚନା ଦେଇଛନ୍ତି ।

ସମ୍ବଲପୁରରୁ ବାଦଶାହ ଯୁଶ୍ମନ ରଣା ଓ ଭୁବନେଶ୍ବରରୁ ତପନ ଦାସ, ଇଟିଭି ଭାରତ