ରାଉରକେଲା: ଆମ ନେତାଏ ଭାରି ରଙ୍ଗୀନ ମିଜାଜର ଆଉ ଦାନୀ ସ୍ବଭାବର । କେବେ ନୃତ୍ୟସଙ୍ଗୀତରେ ମସଗୁଲ୍ ହୁଅନ୍ତି ତ କେବେ ଭୋଟରଙ୍କ ମନ କିଣିବା ପାଇଁ ନିର୍ଧୁମ ନାଚନ୍ତି । ନିର୍ବାଚନୀ ଋତୁରେ ଫୋକସ୍ରେ ରହିବା ପାଇଁ ବିଭିନ୍ନ ବେଶ ଧାରଣ କରନ୍ତି ନେତାଏ । ଏମିତି କିଛି ଦୃଶ୍ୟ ଆସିଛି ରାଉରକେଲାରୁ । ସୁଫି ଓ କୱାଲି ପରିବେଷଣ ସମୟରେ ଗାୟକଙ୍କ ଉପରେ ବଣ୍ଡଲ୍ ବଣ୍ଡଲ୍ ଟଙ୍କା ଉଡାଇଛନ୍ତି ପୂର୍ବତନ ମନ୍ତ୍ରୀ ତଥା ରାଉରକେଲା ବିଜେଡି ବିଧାୟକ ପ୍ରାର୍ଥୀ ସାରଦା ପ୍ରସାଦ ନାୟକ ।
ଟିକେଟ ପାଇଥିବାରୁ ପ୍ରବଳ ଖୁସ୍ ଥିଲେ ନେତାଜୀ । ସୁଫି କୱାଲି ପରିବେଷଣ ସମୟରେ ଗାୟକଙ୍କ ଉପରେ ମନଭରି ଟଙ୍କା ଉଡାଇବା ସହ ନିଜେ ପିନ୍ଧିଥିବା ଫୁଲମାଳ ପିନ୍ଧାଇଥିଲେ ଗାୟକଙ୍କୁ । ସାରଦା ପ୍ରସାଦ ନାୟକ ଏହି କାର୍ଯ୍ୟକ୍ରମରେ ଭାଗ ନେବା ପାଇଁ ସହରର ଟାଣୁଆ ନେତା ତଥା ପୂର୍ବତନ ନଗରପାଳ ନରେନ୍ଦ୍ର ତ୍ରିପାଠୀ ସହିତ ଆସିଥିଲେ ।
ଭିଡିଓ ସୌଜନ୍ୟ: ସମ୍ବାଦଦାତା,ରାଉରକେଲା