ରାଉରକେଲା: କୋରୋନା ସଂକ୍ରମଣର ଭୟାବହତାକୁ ନଜରରେ ରଖି ରାଉରକେଲା ମହାନଗର ନିଗମ ସମେତ ରାଜ୍ୟର 4 ଜିଲ୍ଲାକୁ ଫେରିବ ଲକଡାଉନ କଟକଣା । ଏନେଇ ଗୁରୁବାର ଘୋଷଣା କରିଛନ୍ତି ରାଜ୍ୟ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ । ଆସନ୍ତା ଜୁଲାଇ 17 ତାରିଖ ରାତି 9ଟାରୁ ଜୁଲାଇ 31 ତାରିଖ ମଧ୍ୟରାତ୍ର ପର୍ଯ୍ୟନ୍ତ ଏହି ନୂଆ ଲକଡାଉନ ଲାଗୁ ହେବା ନେଇ ସୂଚନା ରହିଛି ।
ରାଉରକେଲା ମହାନଗର ନିଗମ ଅଞ୍ଚଳ ସମେତ ଗଞ୍ଜାମ, କଟକ, ଖୋର୍ଦ୍ଧା ଓ ଯାଜପୁରରେ ଏହି ନିୟମ ଲାଗୁ ହେବ । ଏଥର ଲକଡାଉନରେ ପୂର୍ବାପେକ୍ଷା କଟକଣା ସାମାନ୍ୟ କୋହଳ ହେବା ନେଇ ଜଣା ପଡିଛି । ଏହିକ୍ରମରେ ସକାଳ 6ଟାରୁ ଦିନ 1ଟା ପର୍ଯ୍ୟନ୍ତ ଗ୍ରୋସେରୀ, ପନିପରିବା ଓ ଦୁଗ୍ଧ ଯୋଗାଣ କେନ୍ଦ୍ର ଖୋଲା ରହିବା ନେଇ ସୂଚନା ରହିଛି । କିନ୍ତୁ ଔଷଧ ଦୋକାନ ଖୋଲିବା ନେଇ କୌଣସି କଟକଣା ରହିବ ନାହିଁ । ସେପଟେ ଆବଶ୍ୟକୀୟ କେତେକ ସରକାରୀ କାର୍ଯ୍ୟାଳୟ ବାଦେ ଅନ୍ୟ ସମସ୍ତ ସରକାରୀ କାର୍ଯ୍ୟାଳୟ ବନ୍ଦ ରଖିବ ପାଇଁ ନିର୍ଦ୍ଦେଶ ରହିଛି ।