ଆଜି ବଡଦାଣ୍ଡରେ ରୋଡ ସୋ କରିବେ ବିଜେପି ସେନାପତି

ପୁରୀ ଆସୁଛନ୍ତି ଅମିତ ଶାହ। ଦଳୀୟ ପ୍ରାର୍ଥୀଙ୍କ ପାଇଁ କରିବେ ନିର୍ବାଚନୀ ପ୍ରଚାର। ବଡଦାଣ୍ଡରେ ହେବ ରୋଡ ସୋ । ଚଳଚଞ୍ଚଳ ବିଜେପି ଶିବିର।

ଭୁବନେଶ୍ବର: ଆସୁଛନ୍ତି ଶାହ । ବଡଦାଣ୍ଡରେ ହେବ ରୋଡ ସୋ। ଦଳର ଲୋକସଭା ଓ ବିଧାନସଭା ପ୍ରାର୍ଥୀଙ୍କ ପାଇଁ ପ୍ରଚାର କରିବେ ବିଜେପିର ରାଷ୍ଟ୍ରୀୟ ଅଧ୍ୟକ୍ଷ। ଶାହଙ୍କ ଗସ୍ତକୁ ସଫଳ କରିବାକୁ ଦଳ ପକ୍ଷରୁ ଚାଲିଛି ବିରାଟ ଆୟୋଜନ।

ସୂଚନା ମୁତାବକ, ଆଜି ସନ୍ଧ୍ୟା 5ଟାରେ ଶାହ ଭୁବନେଶ୍ବର ବିମାନବନ୍ଦରରେ ପହଞ୍ଚିବେ। ସନ୍ଧ୍ୟା 6ଟାରେ ପୁରୀ ଯାଇ ମହାପ୍ରଭୁଙ୍କ ଦର୍ଶନ କରିବେ। ପରେ ବଡଦାଣ୍ଡରୁ ରୋଡ ସୋରେ ବାହାରିବେ ଶାହ। ଗୁଣ୍ଡିଚା ମନ୍ଦିର ପର୍ଯ୍ୟନ୍ତ ଏହି ରୋଡ ସୋ ଚାଲିବ। ଶେଷରେ ଶରଧାବାଲିରେ ଆୟୋଜିତ ଏକ ସାଧାରଣ ସଭାରେ ସେ ସାମିଲ ହେବାର କାର୍ଯ୍ୟକ୍ରମ ରହିଛି। ସେହିପରି ସେବାୟତଙ୍କ ସହ ମଧ୍ୟ ଆଲୋଚନା କରିପାରନ୍ତି ଶାହ।

ସେପଟେ ଶାହଙ୍କ ଗସ୍ତକୁ ନେଇ ଚଳଚଞ୍ଚଳ ହୋଇଉଠିଛି ବିଜେପି ଶିବିର । ପୁରୀ ଲୋକସଭା ଓ ବିଧାନସଭା ଅନ୍ତର୍ଗତ ଦଳୀୟ ପ୍ରାର୍ଥୀଙ୍କ ମଧ୍ୟରେ ବେଶ ଉତ୍ସୁକତା ଦେଖାଦେଇଛି । ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି ।