କଟକ: ସରିଲା କଟକର ଐତିହାସିକ ବାଲିଯାତ୍ରା । ଲୋକାରଣ୍ୟ ହୋଇଥିବା ପଡିଆ ଶୂନଶାନ ହୋଇଯିବ । ତେବେ ଏହି 9 ଦିନ ବ୍ୟାପି ଯାତ୍ରାରେ ବୁଧବାର ପଡିଛି ପୂର୍ଣ୍ଣଚ୍ଛେଦ। ଏହି ସମସ୍ତ ଦିନରେ ନିଜ ଖୁସିକୁ ଭୁଲି ଲୋକଙ୍କ ସୁରକ୍ଷା ଦିଗରେ ତତ୍ପର ଥିଲା କମିଶନରେଟ ପୋଲିସ । ତେବେ ବୁଧବାର ଥିଲା ଐତିହାସିକ ବାଲିଯାତ୍ରାର ଶେଷ ଦିନ । ଆଉ ଦିନରାତି ଏକ କରି ପୋଲିସ ଦେଇଥିଲା ସମସ୍ତଙ୍କୁ ସୁରକ୍ଷା ।
ଶେଷ ହୋଇଛି ବିଶ୍ବ ପ୍ରସିଦ୍ଧ କଟକ ବାଲିଯାତ୍ରା । ବୁଧବାର ଶେଷ ଦିନ ଥିବାରୁ ମହାନଦୀ ଉପର ଓ ତଳ ପଡିଆରେ ଦେଖିବାକୁ ମିଳିଥିଲା ଅସମ୍ଭାଳ ଭିଡ । ଘରକରଣା ଠାରୁ ଆରମ୍ଭ କରି ଇଲେକ୍ଟ୍ରୋନିକ୍ସ ସବୁ ସାମଗ୍ରୀ ଗୋଟିଏ ଯାଗାରେ ମିଳୁଥିବାରୁ ଲୋକଙ୍କ ମନରେ ଉତ୍କଣ୍ଠା ନକହିଲେ ସରେ । ଆଉ ବାଲିରେ ବୁଲି ବୁଲି ଥକିବା ପରେ ସାମ୍ନାରେ ଥାଏ ଚଟପଟା ଖାଦ୍ୟର ଆସର । ଗୋଟେ ପଟେ ସମସ୍ତେ ନିଜ ମଜାରେ ମସଗୁଲ ଥିବା ବେଳେ ଅନ୍ୟପଟେ ନିଜର ଖୁସିକୁ ଲୁଚାଇ କର୍ତ୍ତବ୍ୟ କରିଥିଲେ ପୋଲିସ। ଟ୍ରାଫିକ ଠୁ ଆରମ୍ଭ କରି ପାର୍କିଂ ଓ ପଡିଆ ମଧ୍ୟରେ ଉଭୟ ସାଦା ଓ ଖାକି ପୋଷାକରେ ପଇଁତରା ମାରୁଥିଲେ ପୋଲିସ କର୍ମଚାରୀ ।