କଟକ:କିଶନନଗର ଶୀତଳଭଣ୍ଡାରରୁ ଗ୍ୟାସ ଲିକ, ଲୋକେ ଭୟଭୀତ । ଭୟରେ ଘର ଛାଡ଼ି ପଳାଇଲେ ସ୍ଥାନୀୟ ବାସିନ୍ଦା । ଗ୍ୟାସ ନିୟନ୍ତ୍ରଣ ପାଇଁ ୫ ଦମକଳ ଗାଡି ନିୟୋଜିତ ।
କିଶନନଗର ଶୀତଳଭଣ୍ଡାରରୁ ଗ୍ୟାସ ଲିକ ଘଟଣା, ଆୟତ ହେଲା ପରିସ୍ଥିତି
ଗତକାଲି (ଗୁରୁବାର) ରାତିରେ କିଶନନଗର ବିଶ୍ବାଳପଡାସ୍ଥିତ ମଣ୍ଟେଶ୍ବରୀ ଶୀତଳ ଭଣ୍ଡାରରୁ ବିଷାକ୍ତ ଆମୋନିଆ ଗ୍ୟାସ ଲିକ ହୋଇଥିଲା । ଅଳ୍ପ ସମୟ ମଧ୍ୟରେ ଆଖପାଖ ଅଞ୍ଚଳକୁ ଏହା ବ୍ୟାପୀ ଯାଇଥିଲା । ଫଳରେ ଲୋକଙ୍କ ଆଖି ଓ ନାକ ପୋଡିବା ସହ ଲୋକେ ଅଣନିଶ୍ବାସୀ ହୋଇପଡିଥଲେ । ଫଳରେ ସ୍ଥାନୀୟ ଅଞ୍ଚଳରେ ଆତଙ୍କର ବାତାବରଣ ସୃଷ୍ଟି ହୋଇଥିଲା । ଲୋକେ ଘର ଛାଡି ନିରାପଦ ସ୍ଥାନକୁ ପଳାଇ ଯାଇଥିଲେ । ବିଶେଷ କରି ବିଶ୍ବାଳପଡା ଓ ସାମନ୍ତରାପୁର ଗ୍ରାମବାସୀ ଅଧିକ ପ୍ରଭାବିତ ହୋଇଥିଲେ । ଖବରପାଇ ରଘୁନାଥପୁର, ବିରିଡି ଓ ସାଲେପୁରରୁ ୫ଟି ଦମକଳ ଗାଡି ଘଟଣା ସ୍ଥଳରେ ପହଞ୍ଚିଥିଲା । ଅଗ୍ନିଶମ ବିଭାଗର କର୍ମଚାରୀ ମାନେ ପାଣି ପକାଇବା ସହ ଅକ୍ସିଜେନ ସିଲିଣ୍ଡର ନେଇ ଶୀତଳ ଭଣ୍ଡାର ଗ୍ୟାସ ଲିକ ହେଉଥିବା ଘରେ ପଶିଥିଲେ ଓ ଗ୍ୟାସ ଲିକକୁ ବନ୍ଦ କରିଥିଲେ ।