ଟେନସନରେ କମିଶନର; ବୁଲୁଛନ୍ତି ଅପରାଧି, ପାଉନି ପୋଲିସ

ଖୁଲମ୍ ଖୋଲା ଘଟୁଛି ଅପରାଧ । ଆଉ ବୁଲୁଛନ୍ତି ଅପରାଧି । ଧରିପାରୁନି ପୋଲିସ । ଏପରିକି ଅନେକ ମାମଲା ଥାନାରେ ଗଡ଼ୁଥିବାବେଳେ ସେମାନଙ୍କର ସୁରାକ୍ ପାଉନି କମିଶନରେଟ ପୋଲିସ । ଯାହାକି କମିଶନରେଟଙ୍କ ପାଇଁ ମୁଣ୍ଡବିନ୍ଧା ପାଲଟିଛି ।

ଭୁବନେଶ୍ବର: ଅପଦସ୍ତ ହେଉଛି କମିଶନରେଟ ପୋଲିସ । ମିଳୁନି ଅପରାଧର ସୁରାକ। ଫେରାର ଏବେବି ଅପରାଧି । ବିଗତ ଏକ ମାସ ମଧ୍ୟରେ ରାଜଧାନୀରେ ଘଟିଚାଲିଛି ଅପରାଧ । ଆଉ ପୋଲିସ ଠାରୁ ମଧ୍ୟ ଚାଲାକ ସାଜିଛି ଅପରାଧି । ଯାହାକୁ ନେଇ ଟେନସନରେ କମିଶନରେଟ ପୋଲିସ । କାରଣ ଥାନାବାବୁଙ୍କ ପାଖରେ ନାହିଁ ଅପରାଧିଙ୍କ ସୁରାକ ।

ଏମିତିକି ଅପରାଧରେ ଜାଲରେ ଛନ୍ଦି ହୋଇପଡ଼ୁଛି ପୋଲିସ । ଏବେ ବି ଜଣାପଡୁନି ଘଟଣାର ମୋଡ । ଏନେଇ କମିସନରେଟ ପୋଲିସ କାର୍ଯାଳୟରେ ବସିଥିବା ବୈଠକରେ ସମିକ୍ଷା କରି ଗର୍ଜିଛନ୍ତି ପୋଲିସ କମିସନର । ତେବେ ନଜର ପକାନ୍ତୁ ପୋଲିସର ମୁଣ୍ଡ ବ୍ୟଥା ପାଲଟିଥିବା କେତେକ ପ୍ରମୁଖ ଘଟଣା ଉପରେ ।

୧. ଅଗଷ୍ଟ ୧୯ : ଖାରବେଳ ନଗର ଥାନା ଅନ୍ତର୍ଗତ ଏମଏଲଏ କଲୋନି ଅଗ୍ନିକାଣ୍ଡ ଘଟଣା । ଏଯାଏଁ ପୋଲିସ ହାତରେ ନାହିଁ ସୁରାକ ।
୨. ଅଗଷ୍ଟ ୨୪: ନୟାପଲ୍ଲୀରେ ଆଇଏଏସଙ୍କ ଘରୁ ଲାପଟପ ଚୋରି ଘଟଣାରେ ଅଭିଯୁକ୍ତକୁ ଚିହ୍ନଟ କରିବା ହୋଇଛି ପୋଲିସ ପାଇଁ ମୁସ୍କିଲ ।
୩. ଅଗଷ୍ଟ ୨୮ : ତମାଣ୍ଡୋ ଥାନା ଡିଏନ ରେନଗାଲିଆ ମଲ ଠାରେ ପ୍ରଶାସିକାଙ୍କ ପତ୍ନୀଙ୍କଠୁ ସ୍ନାଚିଂ କରି ଫେରାର ମାମଲାରେ ଅଭିଯୁକ୍ତଂକ ଟେର ମିଳୁନି ।
୪. କ୍ୟାପିଟାଲ ଥାନା ବାପୁଜୀନଗର ହୋଟେଲ ସିଟି ରେସିଡେନସି ମାଲିକଙ୍କୁ ଚାନ୍ଦା ଆଦାୟ ମାମଲାରେ ଏପର୍ଯ୍ୟନ୍ତ ଧରାପଡିନି ମୁଖ୍ୟ ଅଭିଯୁକ୍ତ ।
୫. ଶେଷରେ ସେପ୍ଟେମ୍ବର ୧୧: ମଞ୍ଚେଶ୍ବର ରଙ୍ଗମାଟିଆରେ ଜଳଖିଆ ଦୋକାନୀ ହତ୍ୟା ଘଟଣାକୁ ତିନି ଦିନ ପୁରିଥିଲେ ମଧ୍ୟ ପୋଲିସ ହାତ ଖାଲି ପଡ଼ିଛି ।

ତେବେ ଗତ ଏକ ମାସ ମଧ୍ୟରେ ବିଭିନ୍ନ ଥାନାରେ ହୋଇଥିବା ଏତଲା ଓ ତାର ସମାଧାନକୁ ନେଇ ସମୀକ୍ଷା କରିଛନ୍ତି କମିଶନର । ଆସନ୍ତା ମାସରେ ‘ମୋ ସରକାର’ ଯୋଜନା ଲାଗୁ ହେବାକୁ ଯାଉଥିବା ବେଳେ ନିଜସ୍ବ ଢଙ୍ଗରେ ଥାନାରେ ହେଉଥିବା ଅଭିଯୋଗ ର ସମାଧାନ ଉପରେ ନିରିକ୍ଷଣ ଆରମ୍ଭ କରିଦେଇଛନ୍ତି ପୋଲିସ କମିଶନର । ତେବେ ଆଗକୁ ଦୁର୍ଗାପୂଜାର ମାହୋଲ ଆସୁଥିବା ବେଳେ ଅପରାଧିଙ୍କ ବଢିପାରେ ଉତ୍ପାତ । ଏଭଳି ସ୍ଥିତିରେ ଶୃଙ୍ଖଳାକୁ ବଜାୟ ରଖିବା ପୋଲିସ ପାଇଁ ଆହ୍ବାନ ହୋଇଛି ।

ପୂଜା ମଣ୍ଡପ କର୍ତ୍ତୃପକ୍ଷଙ୍କୁ ଏଥର ଡିଜେ ମନା କରାଯାଇଥିବା ବେଳେ କେତକ ଥାନା ଅଞ୍ଚଳର ପୁଜା ମଣ୍ଡପ ଡିଜେ ପାଇଁ ଦେଇଥିବା ଟଙ୍କା ଫେରସ୍ତ ଆଣୁଛନ୍ତି । ପୋଲିସ କମିଶନରଙ୍କ ପାଇଁ ଏବେ ପୁରୁଣା କେସ ସହ ନୁଆ ପରିସ୍ଥିତି ବଡ ଟେନସନରେ ପକାଇଛି । ନୂତନ ପୋଲିସ କମିଶନର ଦାୟିତ୍ବ ନେବା ପରେ ଦ୍ବିତୀୟ ଥର ପାଇଁ ଶୁକ୍ରବାର ସମସ୍ତ ଥାନାର ଥାନାଧିକାରିଙ୍କୁ ଭେଟି ଆଲୋଚନା ମଧ୍ୟ କରିଛନ୍ତି ।

ଭୁବନେଶ୍ବରରୁ ତାପସ ପରିଡ଼ା, ଇଟିଭି ଭାରତ