ଭୁବନେଶ୍ବର: ରାଜଧାନୀରେ ବଢି ଚାଲିଛି ସାଇବର କ୍ରାଇମର ମାତ୍ରା । ଗତ 5 ମାସରେ ଏନେଇ ଦାଖଲ ହେଲାଣି 500 ଅଭିଯୋଗ। ଅର୍ଥନୈତିକ ଠକେଇଠାରୁ ଆରମ୍ଭ କରି ଡାଟା ଚୋରି ପର୍ଯ୍ୟନ୍ତ ସମସ୍ତ ପ୍ରକାର ସାଇବର କ୍ରାଇମର ପେଣ୍ଠସ୍ଥଳୀ ପାଲଟିଛି ରାଜଧାନୀ । ଏପରିକି ଅଫିସିଆଲ ୱେବସାଇଟ ହ୍ୟାକଠାରୁ ଆରମ୍ଭ କରି ବ୍ୟାକଅପ ନଷ୍ଟ ଓ ବ୍ଲାକମେଲଠାରୁ ଆରମ୍ଭ କରି ସୋସିଆଲ ମିଡିଆରେ ଫେକ ତଥ୍ୟ ସର୍କୁଲେଟ ପର୍ଯ୍ୟନ୍ତ ମଧ୍ୟ ଏକ ବଡ ସମସ୍ୟା ପରି ଉଭା ହୋଇଛି । ଏନେଇ ଏକ ବଡ ଧରଣର କ୍ଷତି ସହୁଛନ୍ତି ସାଇବର ଲୁଟ୍ର ଶିକାର ହେଉଥିବା ବ୍ୟକ୍ତି ।
ରାଜଧାନୀରେ ଏପରି ଅନେକ ଧରଣର ସାଇବର ଅପରାଧ ମୁଣ୍ଡ ଟେକିଥିବାବେଳେ ଏସବୁ ମୁକାବିଲା ନେଇ ଡିସିପି ଅଫିସରେ ଆରମ୍ଭ ହୋଇଛି ନୂଆ ସେଟଅପ । ଅର୍ଥାତ ସାଇବର କ୍ରାଇମ ରୋକିବା ନେଇ ଗଠନ କରାଯାଇଛି ଏକ ସ୍ବତନ୍ତ୍ର ଟିମ । ଯେଉଁଥିରେ ଅଛନ୍ତି ତିନି ଜଣ ସବ ଇନସ୍ପେକ୍ଟର ଓ କିଛି ପୋଲିସ କର୍ମଚାରୀ । ଏହା ସହିତ କିଛି ସାଇବର ଏକ୍ସପର୍ଟ ଓ ଆଇଟି ଏକ୍ସପର୍ଟ ମଧ୍ୟ ଏଥିରେ ସହାୟତା କରୁଛନ୍ତି । ଏନେଇ ପ୍ରଥମ ପର୍ଯ୍ୟାୟରେ ତିନି ଜଣ ସବଇନସ୍ପେକ୍ଟରଙ୍କୁ ଏନେଇ ତାଲିମ ଦିଆଯାଇଛି ଏବଂ ସ୍ବତନ୍ତ୍ର ସେଟଅପ କରାଯାଇଛି । ଯେଉଁଥିରେ ହାଇ ସ୍ପିଡ ଇଣ୍ଟରନେଟ ସହ କିଛି ସର୍ଭର ଆକ୍ସେସ ପାଇଁ ଅନୁମତି ମିଳିଛି ।