ଭୁବନେଶ୍ବର : ଏଣିକି ଚିକଚିକ୍ ଦିଶିବ ରାଜଧାନୀ ଭୁବନେଶ୍ବର । ସ୍ୱଚ୍ଛ ଭାରତ ଅଭିଯାନ କ୍ରମରେ ଜାରି ରହିଛି ସ୍ୱଚ୍ଛ ସର୍ବେକ୍ଷଣ-୨୦୨୨ । ସ୍ୱଚ୍ଛତା କ୍ଷେତ୍ରରେ ଭୁବନେଶ୍ୱରକୁ ଦେଶରେ ସର୍ବଶ୍ରେଷ୍ଠ କରିବାକୁ ବିଏମସି ପକ୍ଷରୁ ନିଆଯାଇଛି ଅନେକ ପଦକ୍ଷେପ । ଏଭଳି ମନ୍ତବ୍ୟ ଦେଇଛନ୍ତି ଭୁବନେଶ୍ବରର ନୂତନ ମେୟର ସୁଲୋଚନା ଦାସ । ଏଥିପାଇଁ ସ୍ୱଚ୍ଛ ସର୍ବେକ୍ଷଣରେ ଜନସାଧାରଣଙ୍କ ସହଭାଗିତା ସହିତ ସହଯୋଗର ଆବଶ୍ୟକତା ଜରୁରୀ । ତେଣୁ ଲୋକଙ୍କ ମଧ୍ୟରେ ଏନେଇ ସଚେତନତା ସୃଷ୍ଟି କରିବା ଉଦ୍ଦେଶ୍ୟରେ ବିଏମସି ପକ୍ଷରୁ ବିଭିନ୍ନ କ୍ଷେତ୍ରରେ ପାରଦର୍ଶିତା ଲାଭ କରିଥିବା ୪ ଜଣ ବିଶିଷ୍ଟ ବ୍ୟକ୍ତି ବିଶେଷଙ୍କୁ ସ୍ୱଚ୍ଛତା ଅଭିଯାନର ବ୍ରାଣ୍ଡ ଆମ୍ବାସଡରରେ ନିଯୁକ୍ତ କରାଯାଇଛି ।
ଏହି କ୍ରମରେ ଆଜି ବିଏମସି ପକ୍ଷରୁ ଏକ ସ୍ୱତନ୍ତ୍ର କାର୍ଯ୍ୟକ୍ରମରେ ଚଳଚ୍ଚିତ୍ର ତାରକା ଦମ୍ପତି ସବ୍ୟସାଚୀ ମିଶ୍ର, ଅର୍ଚ୍ଚିତା ସାହୁ, ସ୍ଥପତି ପଦ୍ମବିଭୂଷଣ ସୁଦର୍ଶନ ସାହୁ ଓ ଦୌଡରାଣୀ ଅଲମ୍ପିଆନ ଅନୁରାଧା ବିଶ୍ୱାଳଙ୍କ ଭଳି ୪ ଜଣ ଆମ୍ବାସଡରଙ୍କୁ ବିଏମସି ପକ୍ଷରୁ ସମ୍ବର୍ଦ୍ଧିତ କରାଯାଇଛି । ଏହି ଅବସରରେ ଜଣେ ସଫେଇ ମିତ୍ରଙ୍କୁ ସ୍ୱଚ୍ଛ ଉଦ୍ୟମୀ ଯୋଜନାରେ ସେସପୁଲ ଗାଡି ଏବଂ ଅନ୍ୟଜଣେ ଭିନ୍ନକ୍ଷମ ବ୍ୟକ୍ତିଙ୍କୁ ଅଳିଆ ଆବର୍ଜନା ସଂଗ୍ରହ କରିବାକୁ ବ୍ୟାଟେରୀ ଚାଳିତ ଗାଡି ପ୍ରଦାନ କରାଯାଇଛି ।