ଭୁବନେଶ୍ବର : ଟୀକାକରଣ କେନ୍ଦ୍ରରେ ଫଟୋ ଓ ପୋଷ୍ଟର ଲଗାଇବାକୁ ନେଇ ବିଜେଡି-ବିଜେପି ମୁହାଁମୁହିଁ ହୋଇଛନ୍ତି । ଟୀକାକରଣ କେନ୍ଦ୍ରରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପୋଷ୍ଟର ଲାଗିବାକୁ ବିରୋଧ କରିଛି ବିଜେପି । ଟୀକାକରଣ କେନ୍ଦ୍ରରେ ମୁଖ୍ୟମନ୍ତ୍ରୀ ପୋଷ୍ଟର ଫାଡ଼ିଛନ୍ତି ବିଜେପି ନେତା ଓ କର୍ମୀ । ଏହାସହ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ପୋଷ୍ଟର କାହିଁକି ଲାଗିବନି ବୋଲି ବିଜେପି ପ୍ରଶ୍ନ କରିଛି । ତେବେ ବିଜେଡି-ବିଜେପିର ଟଣାଓଟରା ଭିତରେ ଏଣ୍ଟ୍ରି ମାରିଛି ଛାତ୍ର କଂଗ୍ରେସ । ଟୀକାକରଣରେ ଅବ୍ୟବସ୍ଥା, ଚିକିତ୍ସାରେ ଅବହେଳା ଅଭିଯୋଗ କରି ଆନ୍ଦୋଳନକୁ ଓହ୍ଲାଇଛି ଛାତ୍ର କଂଗ୍ରେସ ।
ଛାତ୍ର କଂଗ୍ରେସ ସଭାପତି ୟାସିର୍ ନୱାଜଙ୍କ ନେତୃତ୍ବରେ ଆଜି ଭୁବନେଶ୍ବରରେ ଆନ୍ଦୋଳନକୁ ଓହ୍ଲାଇଛି ଦଳ। ରାଜଧାନୀର ସତ୍ୟନଗର ଶ୍ମଶାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଓ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପୋଷ୍ଟର ମାରିଛି ଛାତ୍ର କଂଗ୍ରେସ । ଯଦି ଟିକା ତୁମର ତେବେ, କୋଭିଡ଼ରେ ଲୋକ ପ୍ରାଣ ହରାଇବାର କାରଣ ବି ତୁମେ । ଏ ଭଳି ଭାବେ ଅଭିନବ ଉପାୟରେ ସତ୍ୟନଗର ଶ୍ମଶାନରେ ଫଟୋ ଲଗାଇ ଦଳ ତରଫରୁ ପ୍ରତିବାଦ କରାଯାଇଛି । କୋଭିଡ ସମୟରେ ସ୍ବାସ୍ଥ୍ୟ ସେବାକୁ ଗୁରୁତ୍ଵ ନଦେଇ ଫଟୋକୁ ନେଇ ଉଭୟ କେନ୍ଦ୍ର ଓ ରାଜ୍ୟ ସରକାର ହୀନ ରାଜନୀତି କରୁଛନ୍ତି ବୋଲି ଛାତ୍ର କଂଗ୍ରେସ ଅଭିଯୋଗ କରିଛି ।