ଭୁବନେଶ୍ବର: ଜାତୀୟ ଟେଲିଭିଜନ ଚ୍ୟାନେଲରେ ରସଗୋଲାକୁ ନେଇ ମନ୍ତବ୍ୟ ଦେଇ ଚର୍ଚ୍ଚାରେ ରହିଛନ୍ତି ଓଡ଼ିଶା ଭାଇରାଲ ଗାର୍ଲ ସ୍ଥିତିପଦ୍ମା ଦାଶ । ଏହାପରେ ତାଙ୍କ ନିକଟକୁ ଶୁଭେଚ୍ଛାର ସୁଅ ଛୁଟିବାରେ ଲାଗିଛି । ଏହି ପରିପ୍ରେକ୍ଷୀରେ ଜଣାଶୁଣା ଉଦୀୟମାନ କଳାକାର ପ୍ରିୟଙ୍କା ସାହାଣୀ ସ୍ଥିତିପ୍ରଭାଙ୍କୁ ଭେଟିବା ସହ ତାଙ୍କୁ ଏକ ଉପହାର ପ୍ରଦାନ କରିଛନ୍ତି । ଏହାକୁ ନେଇ ଟ୍ବିଟରରେ ଫଟୋ ସେୟାର କରି ସୂଚନା ଦେଇଛନ୍ତି ପ୍ରିୟଙ୍କା ।
ସ୍ଥିତି ‘ସାରେଗାମାପା’ ନାମକ ଏକ ସଙ୍ଗୀତ ରିଆଲିଟି ଶୋ’ରେ ଭାଗ ନେବାକୁ ଯାଇଥିଲେ । ସେଠାରେ ଜଜ୍ ଥିବା ପ୍ରସିଦ୍ଧ ସଙ୍ଗୀତ ନିର୍ଦ୍ଦେଶକ ହିମେଶ ରେସମିୟା ତାଙ୍କୁ ରସଗୋଲା କାହାର ବୋଲି ପ୍ରଶ୍ନ କରିଥିଲେ । ତେବେ ସ୍ଥିତିଙ୍କ ଜବାବ ଶୁଣି ଉପସ୍ଥିତ ଜଜମାନେ ମଧ୍ୟ କିଛି ସମୟ ପାଇଁ ଚୁପ୍ ହୋଇ ଯାଇଥିଲେ । ସ୍ଥିତିଙ୍କ ପୂର୍ବରୁ ଅନେକ ବଙ୍ଗୀୟ ପ୍ରତିଯୋଗୀଙ୍କୁ ରସଗୋଲା କାହାର ବୋଲି ପ୍ରଶ୍ନ କରିଥିଲେ ହିମେଶ । ତେବେ ସାମ୍ନାରେ ଜଣେ ଓଡ଼ିଆ ପ୍ରତିଯୋଗୀଙ୍କୁ ପାଇ ପୁନଃ ସେ କୌତୁହଳ ଢଙ୍ଗରେ ନିଜ ପ୍ରଶ୍ନ ଦୋହରାଇଥିଲେ ।