ଭୁବନେଶ୍ବର: ରାଜଧାନୀର ନୟାପଲ୍ଲୀ ଅଞ୍ଚଳରେ ଘଟିଛି ଚାଞ୍ଚଲ୍ୟକର ଘଟଣା । ଘର ଆଗରେ କାରରେ ଶୋଇଥିବା ବେଳେ ଜଣେ ବ୍ୟବସାୟୀଙ୍କୁ ଉଠାଇନେଲେ ଦୁର୍ବୃତ୍ତ । ଯାହାର ଦୃଶ୍ୟ ନିକଟରେ ଲାଗିଥିବା ସିସିଟିଭିରେ କଏଦ ହୋଇଛି ।
ଭିଡିଓ ସୌଜନ୍ୟ: ସମ୍ବାଦଦାତା, ଭୁବନେଶ୍ବର ସୂଚନାଯୋଗ୍ୟ, ବ୍ୟବସାୟୀ ଜଣକ ହେଉଛନ୍ତି ଶିବସୁନ୍ଦର ଦାସ । ସେ ନୟାପଲ୍ଲୀ ଆଇଆରସି ଭିଲେଜ ସ୍ଥିତ ନିଜ ବାସଭବନରେ ରୁହନ୍ତି । ଶୁକ୍ରବାର ରାତିରେ ସେ ଘର ବାହାରେ ଥିବା ନିଜ କାର୍ ଭିତରେ ଶୋଇଥିଲେ । ଏତିକିବେଳେ ୬ ଜଣ ଯୁବକ ଏକ ଇନୋଭା କାରରେ ଆସି ତାଙ୍କୁ ଅପହରଣ କରିନେଇଥିଲେ । ଯାହାର ଦୃଶ୍ୟ ସ୍ପଷ୍ଟଭାବେ ସିସିଟିଭିରେ କଏଦ ହୋଇଛି ।
ଅପହରଣକାରୀ ଶିବସୁନ୍ଦରଙ୍କୁ ନେଇ ଯାଉଥିବା ବେଳେ ବାଣୀବିହାର ଓଭରବ୍ରିଜ ଉପରେ ଆରଟିଓ ପକ୍ଷରୁ ଚେକିଂ ଚାଲିଥିଲା । ହଠାତ୍ କାରଟି ବ୍ରେକ ମାରିବାରୁ ଅନ୍ୟ ଏକ ଗାଡ଼ି ସହ ଧକ୍କା ହୋଇଥିଲା । ଠିକ ସମୟରେ ପଛରୁ ଆସୁଥିବା ଗୋଟିଏ ଟ୍ରକ ଦୁଇ କାରକୁ ଧକ୍କା ଦେଇ ଫେରାର ହୋଇଯାଇଥିଲା । ଏ ପରିସ୍ଥିତିରେ ଦୁର୍ବୃତ୍ତ ମାନେ ବାଟ ନପାଇ ଗାଡ଼ି ଛାଡି ପଳାଇଥିଲେ ।
ତେବେ ଗାଡ଼ିକୁ ସହିଦନଗର ଥାନା ପୋଲିସ ଜବତ କରିଥିବା ବେଳେ ଗାଡିରୁ ଦୁଇଟି ମାଉଜର ମଧ୍ୟ ଜବତ କରିଛି । ସିସିଟିଭି ଫୁଟେଜ ଆଧାରରେ ତଦନ୍ତ କରାଯିବା ସହ ଖୁବଶୀଘ୍ର ଅପରାଧୀଙ୍କୁ ଧରାଯିବ ବୋଲି ଭୁବନେଶ୍ବର ଡିସିପି କହିଛନ୍ତି ।
ଭୁବନେଶ୍ବରରୁ ବିକାଶ ଦାସ, ଇଟିଭି ଭାରତ
