ଭୁବନେଶ୍ବର: ଏଣିକି ରାଜଧାନୀରେ ଜୋରରେ ହର୍ଣ୍ଣ ବଜାଇବା ମନା । ଜୋରରେ ହର୍ଣ୍ଣ ମାରୁଥିବା ଗାଡି ଉପରେ କଡା ନଜର ରଖିଛି ଆରଟିଓ । ଏନେଇ ଆଜି ଆରଟିଓ ପକ୍ଷରୁ ରାଜଧାନୀରେ ବଡ ଧରଣର ଚଢାଉ କରାଯାଇଛି । ବିଭିନ୍ନ ଛକ, ରାସ୍ତା ଗଳିକନ୍ଦିରେ ଆରଟିଓ ପକ୍ଷରୁ ଚଢାଉ କରାଯାଉଛି । ବିଶେଷ କରି ଜନଗହଳିପୂର୍ଣ୍ଣ ବାଣୀବିହାର ଓଭର ବ୍ରିଜ ନିକଟରେ ଜୋରଦାର ଚେକିଂ କରାଯାଇଥିଲା ।
ଆରଟିଓ ପକ୍ଷରୁ 25ରୁ ଊର୍ଦ୍ଧ୍ବ ଗାଡି ଗୁଡିକୁ ଯାଞ୍ଚ କରାଯାଇଛି । ଯେଉଁ ଗାଡିର ହର୍ଣ୍ଣ 90 ଡେସିମିଲରୁ ଅଧିକ ସାଉଣ୍ଡ କରୁଛି ସେହି ହର୍ଣ୍ଣ ଗୁଡିକକୁ ମଧ୍ୟ ଜବତ କରାଯାଇଥିଲା । ଦୈନନ୍ଦିନ ରାଜଧାନୀର ପ୍ରମୁଖ ରାସ୍ତା ଦେଇ ଯାତାୟତ କରୁଥିବା ଗାଡି ଗୁଡିକ ବିକଟାଳ ହର୍ଣ୍ଣ ମାରନ୍ତି । ଯେଉଁଥି ପାଇଁ ଧ୍ବନି ପ୍ରଦୂଷଣ ହେବା ସହ ସାଧାରଣ ଲୋକେ ନାନା ହଇରାଣ ହୋଇଥାନ୍ତି । ଏନେଇ କେତେକ ପୋଲିସ ନିକଟରେ ଅଭିଯୋଗ ମଧ୍ୟ କରିଛନ୍ତି । ଏହା ଉପରେ ରୋକ୍ ଲଗାଇବା ପାଇଁ ଅଣ୍ଟା ଭିଡିଛି ଆରଟିଓ । ରାଜଧାନୀର ପ୍ରମୁଖ ରାସ୍ତା, ଛକ ମାନଙ୍କରେ ଏଭଳି ଚଢାଉ କରାଯାଇଛି । ଆଗକୁ ଆହୁରି ଏପରି ଚଢାଉ କରାଯିବ ବୋଲି ଆରଟିଓ ଅଧିକାରୀ କହିଛନ୍ତି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ