ଭୁବନେଶ୍ବର: ସରକାରଙ୍କୁ ଘାଇଲା କଲାଣି ‘କାଳିଆ’ ନିଳା । ଶାସକ ବିଜୁ ଜନତା ଦଳ ପାଇଁ କାଳିଆ ଯୋଜନା ଏବେ କାଳ ସଦୃଶ୍ୟ । ଏହି ଯୋଜନାରେ ୩ ଲକ୍ଷ ୪୧ ହଜାର ଅଯୋଗ୍ୟ ହିତାଧିକାରୀ ଟଙ୍କା ହାତେଇବା କଥା ଖୋଦ ମନ୍ତ୍ରୀ କହିସାରିବା ପରେ ଶାଣିତ ଆକ୍ରମଣ କରିଛନ୍ତି ବିରୋଧି । କାଳିଆ ଅକଳରୁ ମୁକ୍ତି ପାଇଁ ବାଟ ଖୋଜୁଛନ୍ତି ରାଜ୍ୟ ସରକାର । ଆଉ ଏହାରି ଭିତରେ ରାଜ୍ୟ ସରକାରଙ୍କ ପାଇଁ ବାହାରିଛନ୍ତି ଦଳୀୟ ମୁଖପାତ୍ର ।
ଭିଡ଼ିଓ ସୌଜନ୍ଯ: ସମ୍ବାଦଦାତା, ଭୁବନେଶ୍ବର ମଙ୍ଗଳବାର କୃଷି ମନ୍ତ୍ରୀ କାଳିଆ ଯୋଜନା ରେ ଅଯୋଗ୍ୟ ହିତାଧିକାରୀଙ୍କ ତାଲିକା ପ୍ରକାଶ କରିଛନ୍ତି । ତାଲିକା ପ୍ରକାଶ ପରେ ପଦାରେ ପଡ଼ିଛି ଯୋଜନାର ସ୍ବଛତା । ଯେଉଁ ଯୋଜନା ବଳରେ ରାଜ୍ୟରେ ପଞ୍ଚମ ଥର ପାଇଁ ବିଜେଡି ଶାସନ କ୍ଷମତାକୁ ଫେରିଛି । ସେହି କାଳିଆର ଏତେବଡ ଗୋଳମାଳିଆ ସରକାରଙ୍କ ମୁଣ୍ଡ ବିନ୍ଧାର କାରଣ ପାଲଟିଛି । ଏଠାରେ ପ୍ରଶ୍ନ ଉଠୁଛି , ଯେଉଁ ସରକାରୀ ବାବୁ ମାନେ ଏହି ଯୋଜନାର ରୂପରେଖ କରୁଥିଲେ ,ସେମାନଙ୍କ ଉପରେ କାର୍ଯ୍ୟାନୁଷ୍ଠାନ ନେବେ କି ରାଜ୍ୟ ସରକାର ?
କାଳିଆ ପାଇଁ ପ୍ରତି ପଞ୍ଚାୟତରେ କରାଯାଉଥିଲା ଯାଞ୍ଚ । ତଥାପି ଏତେ ସଂଖ୍ୟକ ଅଯୋଗ୍ୟ । ଭୋଟ ପାଇଁ ଅଯୋଗ୍ୟଙ୍କୁ ଯୋଗ୍ୟ ଭୁକ୍ତ କରୁଥିଲେ କି ସରକାରୀ ବାବୁ ? ନୋଡାଲ ଅଧିକାରୀଙ୍କ ନିଯୁକ୍ତି ପରେ ବି ଏତେ ସଂଖ୍ୟାରେ ଅଯୋଗ୍ୟ ହିତାଧିକାରୀ କାଳିଆ ଟଙ୍କା ପାଇଲେ । କିନ୍ତୁ ନିଯୁକ୍ତି ପାଇଥିବା ନୋଡାଲ ଅଫିସର କିଭଳି ଜାଣିପାରିଲେ ନାହିଁ । ଏମାନଙ୍କ ଉପରେ କାର୍ଯ୍ୟାନୁଷ୍ଠାନ ନେବେ କି ସରକାର ?ଏଭଳି କିଛି ପ୍ରଶ୍ନବାଣରେ ସରକାରଙ୍କୁ ଘାଇଲା କରିଛନ୍ତି ବିରୋଧୀ ।
ମୁଖପାତ୍ର ପ୍ରତାପ ଦେବ କହିଛନ୍ତି, କାଳିଆ ଯୋଜନାରେ ୩ ଲକ୍ଷ ୪୧ ହଜାର ଅଯୋଗ୍ୟ ହିତାଧିକାରୀ ନାହାଁନ୍ତି । କେବଳ ୩୨ ହଜାର ହେଉଛନ୍ତି ଅଯୋଗ୍ୟ । ବଡ଼ ଚାଷୀ ଓ ସରକାରୀ କର୍ମଚାରୀ ଅଯୋଗ୍ୟ ବୋଲି କହିଛନ୍ତି ମୁଖପାତ୍ର । ଏମାନଙ୍କ ଭିତରେ ଟଙ୍କା ପାଇଥିବା ୧୨ ହଜାର ହେଉଛନ୍ତି ବଡ଼ ଚାଷୀ । ୨୦ ହଜାର ସରକାରୀ କର୍ମଚାରୀ । କିନ୍ତୁ ମଙ୍ଗଳବାର କୃଷିମନ୍ତ୍ରୀ ରଖିଥିଲେ ଭିନ୍ନ ତଥ୍ୟ । କାଳିଆ ଯୋଜାନରେ ରାଜ୍ୟରେ ସମୁଦାୟ ୩.୪୧ ଲକ୍ଷ ହିତାଧିକାରୀ ଚିହ୍ନଟ ହୋଇଥିବା କହିଛନ୍ତି ଅରୁଣ ସାହୁ ।
ଭୁବନେଶ୍ବରରୁ ତପନ ଦାସ, ଇଟିଭି ଭାରତ
