ଭୁବନେଶ୍ବର:ଓଡ଼ିଶା ଗସ୍ତରେ ଆସିଛନ୍ତି କେନ୍ଦ୍ର କୃଷି ମନ୍ତ୍ରୀ ନରେନ୍ଦ୍ର ସିଂ ତୋମାର(Narendra Singh Tomar) । ଏହି ଅବସରରେ ଓଡ଼ିଶାର ପ୍ରଶଂସା କରିଛନ୍ତି କେନ୍ଦ୍ରମନ୍ତ୍ରୀ । କୋଭିଡ ସତ୍ତ୍ବେ ଦେଶରେ କୃଷକଙ୍କ ଆୟ ବଢିଛି । ମହାମାରୀ ଭିତରେ ବି କୃଷିର ଅଭିବୃଦ୍ଧି ହୋଇଛି ଯେଉଁଥିଲେ ଓଡିଶାର ବିଶେଷ ଭୂମିକା ରହିଥିବା କହିଛନ୍ତି କେନ୍ଦ୍ର କୃଷିମନ୍ତ୍ରୀ । ଗତ ଦୁଇବର୍ଷ ହେବ କୋଭିଡ ଭଳି ସଙ୍କଟ ସ୍ଥିତି ଜାରି ରହିଛି । ଏଭଳି ସ୍ଥିତିରେ ସବୁ କ୍ଷେତ୍ର ଦୋହଲି ଯାଇଥିବା ବେଳେ କୃଷି କ୍ଷେତ୍ରରେ ଅଭିବୃଦ୍ଧି ହୋଇଛି ।
ଆଉ ଏହି ଅଭିବୃଦ୍ଧିରେ ଓଡିଶାର ବିଶେଷ ଅବଦାନ ରହିଥିବା କହିଛନ୍ତି କେନ୍ଦ୍ର କୃଷିମନ୍ତ୍ରୀ । ସେ ଆହୁରି କହିଛନ୍ତି, ''ଖଣି କ୍ଷେତ୍ରରେ ମଧ୍ୟ ଓଡ଼ିଶା ଦେଶରେ ଆଗରେ ଅଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନେତୃତ୍ବରେ କୃଷି ଆଗେଇଛି । ପିଏମ କିଷାନ ଯୋଜନା, ଫସଲ ବୀମା ଯୋଜନାରେ କୃଷକକୁ ସହାୟତା ପ୍ରଦାନ କରାଯାଇଛି । ମହଙ୍ଗା ପ୍ରସଙ୍ଗରେ ମଧ୍ୟ ବିରୋଧୀଙ୍କୁ ଜବାବ ଦେଇଛନ୍ତି କେନ୍ଦ୍ରମନ୍ତ୍ରୀ । ମହଙ୍ଗା କିଭଳି କମିବ, ଲୋକଙ୍କୁ କଷ୍ଟ କିପରି ଦୂର କରାଯିବ ସେଥିପ୍ରତି କେନ୍ଦ୍ର ସରକାର ସଜାଗ ଅଛନ୍ତି ।