ଭୁବନେଶ୍ବର: ଚଳିତ ଆର୍ଥିକ ବର୍ଷରେ ରାଜ୍ୟରେ ବିଜୁଳି ଦର ବୃଦ୍ଧି ନ ପାଉ । ବିଦ୍ୟୁତ ଦର ବୃଦ୍ଧିକୁ ନେଇ ରାଜ୍ୟରେ ଅସନ୍ତୋଷ ଲାଗି ରହିଥିବାବେଳେ ଦର ନ ବଢ଼ାଇବାକୁ ଓଇଆରସି(OERC)ଙ୍କୁ ଅନୁରୋଧ କରିଛି ରାଜ୍ୟ ଶକ୍ତି ବିଭାଗ । ଓଇଆରସି ପକ୍ଷରୁ ଗ୍ରୀଡକୋର ବାର୍ଷିକ ଏଆରଆର ସଂପର୍କରେ ଶୁଣାଣି ବେଳେ ଶକ୍ତି ବିଭାଗ ଏହି ଅନୁରୋଧ କରିଛି । ଚଳିତ ଆର୍ଥିକ ବର୍ଷରେ ବିତରଣ କମ୍ପାନିମାନେ ରାଜସ୍ବ ବଳକା ଥିବାରୁ ତାହାକୁ ବିଚାରକୁ ନେଇ ନୂଆ ଆର୍ଥିକ ବର୍ଷରେ ବିଜୁଳି ଦର ନ ବଢାଇବାକୁ ବିଭାଗ ଅନୁରୋଧ କରିଛି ।
ବିଦ୍ୟୁତର ବୈଷୟିକ ଓ ବ୍ୟବସାୟିକ କ୍ଷତି ହ୍ରାସ କରି ତାହାର ସୁଫଳ ଗ୍ରାହକଙ୍କୁ ଦେବାକୁ ବିତରଣ କମ୍ପାନି ବା ଡିସକମମାନଙ୍କୁ ନିର୍ଦ୍ଦେଶ ଦିଆଯାଉ ବୋଲି ବିଭାଗ ଦାବି କରିଛି । ଏହାଛଡ଼ା ଅନ୍ତଃରାଜ୍ୟ ବିଦ୍ୟୁତ ପରିବହନ ଓ ହ୍ବିଲିଂ ଚାର୍ଜ ଉପରେ ଦିଆଯାଉଥିବା 80 ପ୍ରତିଶତ ରିହାତିକୁ ବନ୍ଦ କରିବାକୁ ଶକ୍ତି ବିଭାଗ ଆୟୋଗଙ୍କ ନିକଟରେ ଦାବି କରିଛି ।