ଓସ୍କାର ଦୌଡରେ ଓଡିଆ ଗଳ୍ପକୁ ନେଇ ନିର୍ମିତ ଫିଲ୍ମ ‘ଯୋସେଫ୍’

ଓଡିଆ ଲେଖକଙ୍କ ଗଳ୍ପକୁ ନେଇ ନିର୍ମିତ ହୋଇଥିବା ଫିଲ୍ମ ‘ଜୋସେଫ୍’କୁ ସଫଳତା । ଏହାକୁ ନେଇ ପ୍ରସ୍ତୁତ ହୋଇଥିବା ହିନ୍ଦୀ ସିନେମା ‘ଜୋସେଫ-ବର୍ଣ୍ଣ ଇନ୍ ଗ୍ରେସ’କୁ 92ତମ ଓସ୍କାର ଲିଷ୍ଟରେ ସାମିଲ କରାଯାଇଛି।

ଭୁବନେଶ୍ବର: ଓଡିଆ ଲେଖକଙ୍କ ଗଳ୍ପକୁ ନେଇ ନିର୍ମିତ ହୋଇଥିବା ଫିଲ୍ମ ‘ଜୋସେଫ୍’କୁ ସଫଳତା। ଏହାକୁ ନେଇ ପ୍ରସ୍ତୁତ ହୋଇଥିବା ହିନ୍ଦୀ ସିନେମା ‘ଜୋସେଫ-ବର୍ଣ୍ଣ ଇନ୍ ଗ୍ରେସ’କୁ 92ତମ ଓସ୍କାର ଲିଷ୍ଟରେ ସାମିଲ କରାଯାଇଛି। ଏହି ଫିଲ୍ମରେ ଅଧିକାଂଶ ଓଡିଆ କଳାକାର ଓ ଟେକ୍ନିସିଆନ କାର୍ଯ୍ୟ କରିଥିବା ସୂଚନା ମିଳିଛି।

ୟୁଥ୍ କଥାଚିତ୍ର ପ୍ରାଇଭେଟ୍ ବ୍ୟାନରରେ ନିର୍ମିତ ହୋଇଥିବା ଏହି ଫିଲ୍ମର ପ୍ରଯୋଜନା ଦାୟିତ୍ବ ତୁଲାଇଛନ୍ତି ଓଡିଆ ପୁଅ କ୍ୟାପଟେନ ଅଶୋକ ମହାପାତ୍ର। ଏହାର ନିର୍ଦ୍ଦେଶନା ଭାର ସମ୍ଭାଳିଛନ୍ତି ଅନ୍ତର୍ଜାତୀୟ ଖ୍ୟାତି ସମ୍ପନ୍ନ ତଥା ଜାତୀୟ ଚଳଚ୍ଚିତ୍ର ସମ୍ମାନରେ ସମ୍ମାନିତ ଓଡିଆ ପୁଅ ସୁଶାନ୍ତ ମିଶ୍ର। ଚଳଚ୍ଚିତ୍ରଟି ଗୋଟିଏ ଅନାଥ ଶିଶୁର ଭବିଷ୍ୟତ ସମ୍ପର୍କିତ କଥାବସ୍ତୁକୁ ନେଇ ନିର୍ମିତ ହୋଇଛି । ଓଡିଆ ଲେଖକ ଉମାକାନ୍ତ ମହାପାତ୍ରଙ୍କ ଦ୍ବାରା ଲିଖିତ କ୍ଷୁଦ୍ରଗଳ୍ପ ‘ଜୋସେଫ୍’ରୁ ପ୍ରେରିତ ଫିଲ୍ମର କାହାଣୀ। ଏହାର ଚିତ୍ରନାଟ୍ୟରେ ରୂପାନ୍ତରିତ କରିଛନ୍ତି ଜାକିର ଖାନ୍।

ଏହି ଫିଲ୍ମର ମୁଖ୍ୟ ଚରିତ୍ରରେ ଜାତୀୟ ସ୍ତରୀୟ ଅଭିନେତା ଭିକ୍ଟର ବାନାର୍ଜୀ, ସୁବ୍ରତ ଦତ୍ତ, ହିତେଶ ବିଷ୍ଟ, ଅନାମିକା ଗୋସ୍ୱାମୀ, ଦୀପିକା ଏଲିଜାବେଥ ଲାକ୍ରା ନଜର ଆସିବେ । 100 ମିନିଟ ସମୟ ଅବଧିର ଏହି ଫିଲ୍ମଟି ଅରୁଣାଚଳ ପ୍ରଦେଶର ଏକ ସତ୍ୟ ଘଟଣାକୁ ନେଇ ଆଧାରିତ ହେବା ବେଳେ ଏହାର ସୁଟିଂ ଉତ୍ତରାଖଣ୍ଡରେ ହୋଇଥିବା କହିଛନ୍ତି ଏହାର ନିର୍ଦେଶକ ସୁଶାନ୍ତ ମିଶ୍ର। ଏହି ଚଳଚିତ୍ରର ଆଗାମୀ ବର୍ଷ ବ୍ୟବସାୟିକ ପ୍ରଦର୍ଶନ ପାଇଁ ପ୍ରସ୍ତୁତି ହେଉଥିବା କଥା ପ୍ରଯୋଜକ କ୍ୟାପଟେନ ମହାପାତ୍ର ପ୍ରକାଶ କରିଥିବାବେଳେ ନିଜ ପ୍ରଯୋଜନା ସଂସ୍ଥାର ପ୍ରଥମ ଫିଲ୍ମ ଭାବେ ଓସ୍କାର ପାଇଁ ନୋମିନେସନ ହୋଇଥିବାରୁ ନିଜ ଖୁସି ବ୍ୟକ୍ତ କରିଛନ୍ତି।

ଭୁବନେଶ୍ୱରରୁ ଲକ୍ଷ୍ମୀକାନ୍ତ ଦାସ, ଇଟିଭି ଭାରତ