ଭୁବନେଶ୍ବର: ବାହାରିନରେ ରାଷ୍ଟ୍ରୀୟ ଏକତା ଦିବସ ପାଳନ କରାଯାଇଛି । ଲୌହମାନବ ସର୍ଦ୍ଦାର ବଲ୍ଲଭ ଭାଇ ପଟେଲଙ୍କ ୧୪୬ ତମ ଜୟନ୍ତୀ ଅବସରରେ ଭାରତ ଦୂତାବାସ ଓ ବାହାରିନ ସଂସ୍କୃତି ଓ କଳା ସମାଜ 'ବିକାଶ' ପକ୍ଷରୁ ଦୁଇ ଦିନ ଧରି ଏକତା ଦିବସ ପାଳିତ ହୋଇଛି । ଏହି ଅବସରରେ ଭାରତର ବିଭିନ୍ନ ରାଜ୍ୟ ଓ ଭାଷାଭାଷୀ ସମାଜ ଜରିଆରେ ଭାରତର କଳା, ସଂସ୍କୃତିର ପ୍ରଦର୍ଶନ ହୋଇଛି ।
ବାହାରିନ ଓଡ଼ିଆ ସମାଜ ପ୍ରମୁଖ ଆୟୋଜକ ଭାବରେ ଓଡ଼ିଶୀ, ସମ୍ବଲପୁରୀ ସମେତ ଅନ୍ୟାନ୍ୟ ଲୋକକଳା, ଲୋକସଂସ୍କୃତି ପ୍ରଦର୍ଶନ କରାଯାଇଛି । ବିଭିନ୍ନତାରେ ଏକତା ବାର୍ତ୍ତା ବହନ କରୁଥିବା ଜାତୀୟ ସଂହତି ପ୍ରଦର୍ଶିତ ହେଉଥିବା ସାଂସ୍କୃତିକ ବିଚିତ୍ରା ପରିବେଷଣ ବେଶ ପ୍ରଶଂସିତ ହୋଇଛି । ବାହାରିନ ଓଡ଼ିଆ ସମାଜର ପ୍ରତିଷ୍ଠାତା ସଭାପତି ତଥା 'ବିକାସ'ର ଉପାଧ୍ୟକ୍ଷ ଡ. ଅରୁଣ କୁମାର ପ୍ରହରାଜ ସ୍ବାଗତ ଭାଷଣ ଦେଇଛନ୍ତି । ଭାରତୀୟ ରାଷ୍ଟ୍ରଦୂତ ପୀୟୂଷ ଶ୍ରୀବାସ୍ତବ ଏବଂ 'ବିକାସ'ର ଅଧ୍ୟକ୍ଷ ଭଗବାନ ଅସରପୋତା ଐକ୍ୟ ପୁରୁଷ ସର୍ଦ୍ଦାର ପଟେଲଙ୍କ ତୁଙ୍ଗ ବ୍ୟକ୍ତିତ୍ବ ଉଦ୍ଦେଶ୍ୟରେ ଶ୍ରଦ୍ଧାଞ୍ଜଳି ବକ୍ତବ୍ୟ ରଖିଥିଲେ ।