ଦବିଲା ପଳାଶୁଣୀ ବାଇପାସ ଓଭର ବ୍ରିଜ

ଦବିଲା ପଳାଶୁଣୀ ଓଭରବ୍ରିଜର କିଛି ଅଂଶ । ରବିବାର ସଂଧ୍ୟାରେ ବ୍ରିଜ ଦବିଥିବା ଜଣାପଡିଛି । ଘଟଣାସ୍ଥଳରେ ପୋଲିସ ଓ ବିଭାଗୀୟ ଅଧିକାରୀ ପହଞ୍ଚି ଯାଞ୍ଚ କରିଛନ୍ତି ।

ଭୁବନେଶ୍ବର: କିଛି ଦିନର ବ୍ୟବଧାନ ପରେ ଆଜି ଆଉ ଏକ ଓଭର ବ୍ରିଜ ଦବିବାର ଚିତ୍ର ସାମ୍ନାକୁ ଆସିଛି। ପଳାଶୁଣୀ ନିକଟ ପୁରୀ ବାଇପାସ ଓଭର ବ୍ରିଜ ଦୀର୍ଘଦିନର କାର୍ଯ୍ୟ ପରେ ଏବେ ଯାତାୟତ ପାଇଁ ବ୍ୟବହାର ହେଉଥିଲା । ହେଲେ ରବିବାର ବ୍ରିଜର ମଧ୍ୟଭାଗର କିଛି ଅଂଶ ଦବି ଯାଇଥିବାର ଦେଖିବାକୁ ମିଳିଛି।

ରବିବାର ସନ୍ଧ୍ୟା ପାଖାପାଖି 6ଟା ସୁଦ୍ଧା ଏହାର ମଝି ଅଂଶର 3ରୁ 4 ଫୁଟ ଭିତରେ 7/8 ଇଞ୍ଚର ଏକ ଖାଲ ହୋଇଯାଇଥିବା ଦେଖିବାକୁ ମିଳିଥିଲା। ଯେଉଁଥିପାଇଁ ବ୍ରିଜ ଦେଇ ଯାତାୟତ କରୁଥିବା ଲୋକଙ୍କୁ ଭୟଭୀତ କରିଥିଲା । ଅନେକ ଲୋକ ଗାଡି ନେବାକୁ ନମଙ୍ଗିବାରୁ ସମୟ ଧରି ଗାଡି ଚଳାଚଳ ବନ୍ଦ ରହିଥିଲା ।

ଅନେକସସମୟ ପର୍ଯ୍ୟନ୍ତ ରାସ୍ତା ବନ୍ଦ ରହିବାରୁ ପୋଲିସ ଓ ପୂର୍ତ୍ତବିଭାଗ କର୍ତ୍ତୃପକ୍ଷ ଘଟଣାସ୍ଥଳରରେ ପହଞ୍ଚିଥିଲେ । ଘଟଣା ଯାଞ୍ଚ କରିବା ସହ ବାଲିବସ୍ତା ପକାଇ ରାସ୍ତା ସମାନ କରିଥିଲେ । ଲଗାଣ ବର୍ଷା ଯୋଗୁଁ ଏଭଳି ସ୍ଥିତି ହୋଇଥିବା କ୍ୟାମେରା ପଛରେ କହିଛନ୍ତି ବିଭାଗୀୟ ଅଧିକାରୀ । ଏପଟେ ବିଭାଗୀୟ କର୍ତ୍ତୃପକ୍ଷଙ୍କୁ ଦୋଷ ଦେଇଛନ୍ତି ସାଧାରଣ ଲୋକେ । ସରକାର ଏଥିପାଇଁ ନିୟୋଜିତ ସଂସ୍ଥା କୁ ଉତ୍ତରଦାୟୀ କରିବା ସହିତ ବିଭାଗୀୟ ଅଧିକାରୀଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଦାବି କରିଛନ୍ତି ଲୋକେ।

ଭୁବନେଶ୍ବରରୁ ଲକ୍ଷ୍ମୀକାନ୍ତ ଦାସ,ଇଟିଭି ଭାରତ