ଭୁବନେଶ୍ବର: 73ତମ ସ୍ବଧୀନତା ଦିବସ ପାଇଁ ରାଜଧାନୀ ଭୁବନେଶ୍ବର ହୋଇଯାଇଛି ପ୍ରସ୍ତୁତ । ଏଥର ଗାନ୍ଧିମାର୍ଗରେ ନୁହେଁ ପ୍ରଦର୍ଶନୀ ପଡିଆରେ ପାଳନ କରାଯିବ ସ୍ବାଧୀନତା ଦିବସ । ଏଥିପାଇଁ ସମସ୍ତଙ୍କ ମନରେ ଉତ୍ସାହ କିନ୍ତୁ ମନ ମଉଳି ଯାଇଛି ଭୁବନେଶ୍ବର ମହର୍ଷି କଲେଜ ଡେୟାର ଡେଭିଲ୍ସ ଟିମର । କାରଣ ଏଥର ସେମାନେ ଆଉ କରି ପାରିବେନି ନିଜର ଡେୟାର ଡେଭିଲ୍ସ ଶୋ ପ୍ରଦର୍ଶନ । ପ୍ରଦର୍ଶନୀ ପଡିଆରେ ସ୍ଥାନ କମ ଥିବାରୁ ସେଠାରେ ସେମାନଙ୍କ ଶୋ ପ୍ରଦର୍ଶନ କରିବା ସମ୍ଭବପର ହୋଇ ପାରିନାହିଁ ।
2012 ମସିହାରୁ କ୍ରମାଗତ ଭାବେ ବାଇକ ମଡେଲରେ ଭାରତୀୟ ବାୟୁସେନାର ବିଭିନ୍ନ ବିମାନ ଯଥା, ସୁଖୋଇ, ମିଗ ଓ ମିରାଜ ଇତ୍ୟାଦିର ପ୍ରଦର୍ଶନ କରୁଥିବା ଏହି ଟିମ କାର୍ଯ୍ୟକ୍ରମର କେନ୍ଦ୍ରବିନ୍ଦୁ ପାଲଟୁଥିଲା । ବେଶ ପ୍ରଶଂସା ସାଉଁଟୁଥିଲା ମହର୍ଷି କଲେଜ ଛାତ୍ରଛାତ୍ରୀଙ୍କ ଏହି ଡେୟାର ଡେଭିଲ୍ସ ଟିମ । କିନ୍ତୁ ସ୍ଥାନ ପରିବର୍ତ୍ତନ ନେଇ ସରକାରଙ୍କ ଘୋଷଣା ପରେ ମନ ଦୁଃଖ କରିଛନ୍ତି ଟିମର ସଦସ୍ୟ । କାରଣ ଏହି ସବୁ ଶୋ ପାଇଁ ତାଙ୍କୁ ଦରକାର ସମାନ୍ତରାଳ ଥିବା ଅଧା କିଲୋମିଟର ରାସ୍ତା ଯାହା ପ୍ରଦର୍ଶନୀ ପଡିଆରେ ଉପଲବ୍ଧ ହୋଇ ପାରୁନାହିଁ । ତଥାପି କିନ୍ତୁ କମିନାହିଁ ଡେୟାର ଡେଭିଲ୍ସଙ୍କ ମନୋବଳ । ରାଜ୍ୟସ୍ତରୀୟ କାର୍ଯ୍ୟକ୍ରମରେ ନ ହେଉ ପଛକେ ସ୍ବାଧୀନତା ଦିବସ ଅବସରରେ ନିଜ କଲେଜ ପଡିଆରେ ଚଳିତ ଥର ପ୍ରଦର୍ଶନ କରିବ ଏହି ଟିମ ।