ଭୁବନେଶ୍ବର: ପୁଅ ମୃତ୍ୟୁର ନ୍ୟାୟ ପାଇଁ ଥାନା ଆଗରେ ଧାରଣା ଦେଲେ ପରିବାର । ଗୋଟେ ବୋଲି ପୁଅକୁ ହରେଇବା ଦୁଃଖରେ ମର୍ମାହତ ପରିବାର । ପୁଅର ପ୍ରତିଟି ଇଚ୍ଛାକୁ ପୂରଣ କରୁଥିଲେ ବାପା ମା' । ଏକ ମାସ ପୂର୍ବେ ପୁଅ ସ୍ବିମିଂ ପ୍ରଶିକ୍ଷଣ ପାଇଁ ଆସିଥିବା ବେଳେ ଭୁବନେଶ୍ୱର କ୍ଲବ ସ୍ବିମିଂ ପୁଲରେ ତାର ମୃତ୍ୟୁ ଘଟିଥିଲା । ମୃତ୍ୟୁକୁ ଦୀର୍ଘ ଦିନ ବିତିଯାଇଥିଲେ ମଧ୍ୟ ଆଜି ପର୍ଯ୍ୟନ୍ତ ପରିବାର ଲୋକଙ୍କୁ ନ୍ୟାୟ ମିଲିପାରିଲା ନାହିଁ । ଫଳରେ ନ୍ୟାୟ ପାଇଁ କ୍ୟାପିଟାଲ ଥାନା ସମ୍ମୁଖରେ ପରିବାରବର୍ଗ ଧାରଣାରେ ବସି ରହିଥିଲେ ।
ଭିଡିଓ ସୌଜନ୍ୟ: ସମ୍ବାଦଦାତା, ଭୁବନେଶ୍ବର
ସୂଚନାନୁସାରେ, ମେ ୨୬ ତାରିଖରେ ସନ୍ଦୀପ ସାହୁ(୧୮) ସନ୍ତରଣରେ ଦକ୍ଷତା ବୃଦ୍ଧି ନିମନ୍ତେ ଭୁବନେଶ୍ୱର କ୍ଲବ ପରିସରରେ ଥିବା ସନ୍ତରଣ ପୁଲରେ ସ୍ବିମିଂ ଶିଖିବାକୁ ଆସି ତାଙ୍କ ସନ୍ଦେହଜନକ ଭାବରେ ମୃତ୍ୟୁ ହୋଇଥିଲା । ପୁଅର ମୃତ୍ୟୁକୁ ଏକ ମାସରୁ ଉର୍ଦ୍ଧ୍ବ ସମୟ ବିତିଯାଇଥିଲେ ମଧ୍ୟ ନ୍ୟାୟ ପାଇଁ ଘୁରି ବୁଲୁଛନ୍ତି ପରିବାର ଲୋକ ।