ଭୁବନେଶ୍ବର: ମହାମାରୀ କୋରୋନା ମୁକାବିଲା ପାଇଁ ବିଧାନସଭାର ବଜେଟ ଅଧିବେଶନ ଅଧାରୁ ସ୍ଥଗିତ ରହିଛି । ବାଚସ୍ପତି ମାର୍ଚ୍ଚ 13ରୁ ମାର୍ଚ୍ଚ 29 ପର୍ଯ୍ୟନ୍ତ ଗୃହକୁ ମୁଲତବୀ ରଖିଥିଲେ । ତେବେ କୋରୋନାର ପ୍ରକୋପ ବଢୁଥିବାରୁ ଆଉ ବିଧାନସଭା ଶେଷ ପର୍ଯ୍ୟନ୍ତ ଚଳାଇବା ସମ୍ଭବ ନୁହେଁ । ଏଥିପାଇଁ ଆଜି( ଗୁରୁବାର) ବାଚସ୍ପତିଙ୍କ ଦ୍ବାରା ଆୟୋଜିତ ଏକ ବୈଠକରେ ଗୁରୁତ୍ବପୂର୍ଣ୍ଣ ନିଷ୍ପତି ନିଆଯାଇଛି ।
ମାର୍ଚ୍ଚ 30ରେ ଗୋଟିଏ ଦିନ ପାଇଁ ବିଧାନସଭା
ବାଚସ୍ପତିଙ୍କ ସୂଚନା ଅନୁସାରେ ମାର୍ଚ୍ଚ 30 ତାରିଖରେ ଗୋଟିଏ ଦିନ ପାଇଁ କେବଳ ବିଧାନସଭା ବସିବ । ଏହି ଦିନ ବାକି ଥିବା ବିଭାଗର ଖର୍ଚ୍ଚ ଦାବି ବଜେଟ ଗିଲୋଟିନ ମାଧ୍ୟମରେ ପାରିତ ହେବା ସହିତ ବ୍ୟୟମଞ୍ଜୁର ବିଲକୁ ମଧ୍ୟ ପାରିତ କରାଯିବ । ବିଧାନସଭାରେ ବଜେଟ ପାରିତ ହେବା ବାଧ୍ୟତାମୂଳକ । ନଚେତ ରାଜ୍ୟ ସରକାର କୌଣସି ଅର୍ଥ ଖର୍ଚ୍ଚ କରିପାରିବେ ନାହିଁ । ଯେଉଁଥିପାଇଁ 30ରେ ବଜେଟକୁ ବିଧାନସଭାରେ ପାରିତ କରାଯିବ ।